Россия нефть компаниялари Ҳиндистон заводлари рад эта бошлаган партияларни сотиш учун Хитойга нефтни юқори чегирмаларда беришга мажбур бўлмоқда.
Манабаларга кўра, Болтиқбўйи портларида Urals маркали нефтнинг айрим партиялари Brent маркасига нисбатан бир баррел учун 35 долларгача чегирма билан сотилмоқда. Бу уруш давридаги рекорд кўрсаткичдир. Brentнинг ҳозирги нархларини инобатга олганда, бу Urals нефтининг бир баррели 30 доллардан ҳам арзонлашганини англатади. Бу кўрсаткич пандемия давридан бери энг паст даража ҳисобланади.
Urals учун ўртача чегирмалар Болтиқ денгизида бир баррел учун 21,5 долларни, Қора денгизда эса, тахминан, 20 долларни ташкил этади. Россиянинг асосий экспорт нефти ўртача 40 доллар атрофида сотилмоқда. 2025 йил бошига нисбатан асосий экспорт маркаси 40 фоизга арзонлашган.
“Роснефт” ва “Лукойл”га қарши санкциялар кучайтирилгач, Грециянинг танкер компаниялари Россия нефтини ташишдан бош тортишни бошлади, дейди Vortеха таҳлилчиси Делиа Хе.
Агар ноябрь ойида Россия нефтининг ҳар тўртинчи баррели Греция танкерларида ташилган бўлса, кейинги даврда уларнинг улуши 10 фоизгача тушиб кетган. Россия портларига кирган 35 та кемадан ҳозир атиги 10 таси фаолиятини давом эттирмоқда.
Натижада Россия нефтчилари танкерлар етишмовчилигига дуч келиши мумкин, деб ҳисоблайди Хе.
Унинг ҳисоб-китобларига кўра, режалаштирилган экспорт ҳажмини таъминлаш учун Россияга умумий юк кўтариш қуввати 6,5 миллион тоннани ташкил этадиган қарийб 50 та Суэзмах ёки Афрамах туридаги танкер етишмайди. Уралс нархининг пасайиши Россия бюджети учун муаммоларни янада кучайтириши мумкин. Чунки бу йилнинг ўзида хом ашё даромадлари 20 фоиздан ортиққа камайган. Иқтисодий ривожланиш вазирлиги маълумотларига кўра, ноябрь ойида нефтнинг ўртача солиқ нархи 44,8 долларгача тушган. Бу сўнгги 5 йил ичидаги энг паст кўрсаткичдир.
Reuters ҳисоб-китобларига кўра, декабрь ойида нефть-газ компанияларидан тушадиган солиқ тушумлари 410 миллиард рубльгача камайиши мумкин. Бу 2020 йил августидан бери энг паст даража ҳисобланади. 2024 йил декабрига нисбатан улар 380 млрд рубльга ёки 49 фоизга паст бўлади.
