“ПСЖ” ҳимоячиси Ашраф Ҳакими Африка қитъасида “йилнинг энг яхши футболчиси” деб топилди. Бу ҳақда Африка футбол конфедерацияси (АФК) хабар берди.
Тақдирлаш маросими Рабат шаҳрида бўлиб ўтди. Ҳакими билан бир қаторда мукофот учун “Ливерпуль” ҳужумчиси Муҳаммад Салоҳ ва “Галатасарой” футболчиси Виктор Осимхен ҳам номзод бўлган. Аммо овоз бериш якунига кўра, парижликлар ҳимоячиси Ашраф Ҳакими ғолибликни қўлга киритди.
27 ёшли Ҳакими илк бор ушбу мукофотни қўлга киритди. Ўтган йилнинг энг яхши футболчиси Италиянинг “Аталанта” клуби ҳужумчиси Адемола Лукман бўлган эди. Ушбу совринни қўлга киритш бўйича рекорд камерунлик ҳужумчи Самуэл Этo’о ва Кот-д’Ивуар терма жамоаси ярим ҳимоячи Яя Турега тегишли бўлиб, ҳар бири бу мукофотни тўрт мартадан қўлга киритган.
Маълумот учун, 2024/2025-йилги мавсум Ҳакими учун омадли кечди. Ҳимоячи “ПСЖ” билан Чемпионлар Лигаси ғолиби бўлди; финалда француз жамоаси Италиянинг “Интер” клубини 5:0 ҳисобида мағлуб этди ва Ҳакими финалда ўз ҳисобига гол ёздириб қўйди. Шунингдек, футболчи 2024/25-йилги мавсум давомида “ПСЖ” билан Франция чемпионати, Кубок ва Суперкубокни ҳам ютди.
