Олий суд маълумотларига кўра, ажралишларнинг асосий сабаблари орасида турмушдаги келишмовчиликлар, молиявий қийинчиликлар ва қариндошларнинг оила ҳаётига аралашуви етакчи ўринда қолмоқда. Бу хақида NUZ хабар бермоқда.
2025 йилнинг январь–сентябрь ойлари давомида Ўзбекистон судлари никоҳни бекор қилиш бўйича 52 мингдан зиёд ишни кўриб чиққан. Улардан 27 578 таси расман ажралиш билан якунланган, яна 18 430 та оилага ярашиш имкони берилган — судлар уларнинг даъволарини рад этган.
Ушбу даврда судлар жами 472 932 та фуқаролик ишини кўриб чиққан, улар орасида шартномалар, уй-жой масалалари ва алимент бўйича тортишувлар ҳам бор.
Олий суд маълумотларига кўра, никоҳни бекор қилиш ишлари фуқаролик ишларининг энг кўп учрайдиган тоифаларидан бири бўлиб қолмоқда. Мутахассислар таъкидлашича, ажралишлар сабаблари турлича — маиший низолар ва молиявий қийинчиликлардан тортиб, қариндошлар босимигача.
Бундан ташқари, тўққиз ой ичида судлар 8,2 триллион сўмдан зиёд маблағга тенг 1,1 миллиондан ортиқ суд буйруғини чиқарган — асосан алимент, маош қарздорлиги ва коммунал тўловлар бўйича.
Шунингдек, судлар апелляция ва кассация тартибида чиқарилган қарорларни фаол равишда қайта кўриб чиққан, бу эса Олий суд маълумотларига кўра, суд қарорларининг қонунийлиги ва сифатини таъминлаш устидан назорат кучайганини кўрсатади.
