Астрономия институти олимлари НАСАнинг халқаро мукофоти билан тақдирланди. Бу ҳақда Фанлар академияси матбуот хизмати хабар қилди.
Қайд этилишича, институтнинг лабароторияси мудири Отабек Бурхонов ва катта илмий ходим Камолиддин Эргашев НАСА томонидан Group Achievement Award мукофоти билан тақдирланди. Мукофот Double Asteroid Redirection Test (DART) халқаро космик миссияси доирасида эришилган натижа учун берилди.
DART миссияси
Double Asteroid Redirection Test инсоният тарихида илк бор астероид орбитасини ўзгартиришга қаратилган сайёравий ҳимоя тажрибасидир.
Миссия 2022 йил 26 сентябрь куни кичик астероид тизими — Didymos астероидининг йўлдоши Dimorphos’га космик кемани тўқнаштириш орқали амалга оширилди. Зарба натижасида Dimorphos’нинг Didymos атрофидаги йўналиши ўзгарди.
Ушбу ўзгариш Ер ва космик телескоплар ёрдамида аниқ ўлчанди. Бу инсоният тарихида биринчи марта сунъий равишда астероид йўналишини ўзгартириш ва унинг натижасини экспериментал тарзда тасдиқлаш бўлган.
Ўзбекистонлик олимлар DART миссиясининг ердан кузатувлар бўйича ишчи гуруҳи таркибида Майданак обсерваторияси телескоплари билан иштирок этган. Жамоанинг асосий вазифаси зарбадан олдинги ва кейинги ўзгаришни аниқлаш ҳамда ҳисоблашдан иборат бўлган.
“Айнан шу ўлчов натижалари DART тажрибасининг муваффақиятли амалга оширилганини илмий жиҳатдан тасдиқлади”, дейилади хабарда.
