Қирғизистон Ўзбекистондан олиб келинган 28 тонна сабзавотни ортга қайтариб юборди. Бу ҳақда республика Қишлоқ хўжалиги вазирлигига таяниб, “24.кг” хабар берди.
Маҳсулотлар “Қизил-Қия — автойўл” фитосанитария назорат пунктидан қайтарилган. Гап 23 тонна пиёз ва 5 тонна сабзи ҳақида кетмоқда. Текшириш чоғида мутахассислар маҳсулот қадоғида мажбурий маркировка йўқлигини аниқлаган.
Карантин остидаги маҳсулотларни маркировкасиз олиб кириш ЕОИИнинг ягона фитосанитария талабларини бузиш ҳисобланади. Шу сабабли мазкур юк импорт қилинган давлатга қайтариб юборилган.
Бу қўшни давлатнинг товарларни ортга қайтариши билан боғлиқ биринчи ҳолат эмас. Қирғизистон маркировка йўқлиги сабабли июнь ойида 650 кило колбасани, май ойида эса 21 тонна тарвузни ортга қайтарганди. Январь ойида фитосанитария сертификати ва маркировкаси бўлмагани учун салкам 27 тонна пиёз ҳам Ўзбекистонга жўнатиб юборилган. Шунингдек, 2025 йилда писта ва қовун юклари билан боғлиқ шундай ҳолатлар кузатилган.
