Жиззах шаҳри ва Шароф Рашидов тумани оралиғида Янги Жиззах шаҳри барпо этилади. Бу ҳақда президент томонидан 30 январь куни имзоланган қарорда айтилади.
Ҳужжат ҳудудда инфратузилма ва бизнес муҳитини янада яхшилаш, туризм салоҳиятини тўлиқ рўёбга чиқариш, “яшил” тамойил ва ёндашувларни кенг жорий қилиш, аҳоли бандлиги ва даромадларини ошириш ҳамда камбағалликни қисқартириш мақсадида қабул қилинди.
Жиззах вилояти ялпи ҳудудий маҳсулот ҳажми йиллик ўртача 8,5 фоизга, саноат ишлаб чиқариш ҳажми 7,8 фоизга, бозор хизматлари ҳажми 13,2 фоизга ҳамда қишлоқ хўжалиги маҳсулотлари етиштириш ҳажми 4,6 фоизга ўсишини таъминлаш 2026—2027-йиллардаги асосий мақсад сифатида белгиланди.
Қарорга кўра, қуйидагилар Жиззах вилоятини 2026–2027-йилларда барқарор ижтимоий-иқтисодий ривожлантиришнинг асосий мақсадлари этиб белгиланди, жумладан:
- ялпи ҳудудий маҳсулот ҳажми йиллик ўртача 8,5 фоизга, саноат ишлаб чиқариш ҳажми 7,8 фоизга, бозор хизматлари ҳажми 13,2 фоизга ҳамда қишлоқ хўжалиги маҳсулотлари етиштириш ҳажми 4,6 фоизга ўсишини таъминлаш;
- 2026-йилда ишсизлик даражасини 3 фоизга ва камбағаллик даражасини 2,8 фоизга тушириш, Жиззах шаҳри, Шароф Рашидов, Бахмал, Ғаллаорол, Дўстлик, Зомин ва Зафаробод туманларини камбағаллик ва ишсизликдан холи ҳудудга айлантириш.
Бахмал, Ғаллаорол, Зомин, Фориш ва бошқа туманларнинг 57 та боғдорчиликка ихтисослашган маҳаллаларида 5 минг гектар эски боғ ва токзорларни янгилаш белгиланди.
Шароф Рашидов, Дўстлик, Ғаллаорол, Арнасой ва Зафаробод туманларида 40 та маҳаллани ўз фаолияти билан қамраб олувчи 5 та тадбиркорлик марказлари ташкил этилади.
Жиззах шаҳри ва Шароф Рашидов тумани ўртасидаги 40 гектар бўш ер майдонига Янги Жиззах шаҳрини жойлаштириш ҳамда унда 1 200 хонадонли 50 та кўп қаватли уйларни қуриш белгиланди.
