Ўзбекистонда пул массаси (банклардаги жами депозитлар ва муомаладаги нақд пуллар) бир йилда 37 фоизга ошди. Марказий банк таҳлилига кўра, рекорд ўсиш асосан депозитлар кўпайиши ҳисобига юз берган.
2026 йил 1 январь ҳолатига кўра, мамлакатдаги умумий пул массаси 379 триллион сўмга етган. Таққослаш учун, 2025 йил бошидаги кўрсаткич 277 триллион сўм эди. Бир йил ичида иқтисодиётдаги пул миқдори қарийб 102 триллион сўмга кўпайган.
Пул массаси бундай тез кенгайишида сўмдаги депозитлар кескин ортгани асосий рол ўйнаган. Жорий йил аввалида миллий валютадаги жами депозитлар 241 триллион сўмни ташкил этган. Бир йил илгари бу кўрсаткич 167 триллион сўм бўлган. 12 ой ичида сўмдаги депозитлар 74 триллион сўмга кўпайган.
Чет эл валютасидаги депозитлар ҳам ўсишда давом этиб, умумий қиймати 70 триллион сўмга етган. Мазкур кўрсаткич ўтган йил бошидаги 57 триллион сўм билан солиштирганда 13 триллион сўмга ўсган.
Пул массаси таркибида муомаладаги нақд пуллар миқдори ҳам тез суръатда кўпайган. Жорий йил бошида иқтисодиётдаги жами нақд пуллар миқдори 68 триллион сўмни ташкил этган. Бир йил аввал бу кўрсаткич 53 триллион сўм бўлган. Демак, 12 ой ичида муомалага 15 триллион сўм қўшимча нақд пуллар чиқарилган.
Пул массасининг бир вақтнинг ўзида депозитлар ва нақд пуллар ҳисобига ошиши иқтисодиётда пул таклифи кескин кенгаяётганини кўрсатади. Бу ҳолат мамлакатда нархлар барқарорлигига босим сақланиб қолиши мумкинлигини англатади.
