2025 йил 17–23 ноябрь кунлари Афғонистоннинг Кобул шаҳрида “Имом Абу Ҳанифа” IV халқаро кўргазмаси ва савдо ярмаркаси ўтказилади. Унда Made in Uzbekistan миллий стенди билан 90 нафар ўзбекистонлик тадбиркор иштирок этади.
Савдо-саноат палатаси хабарига кўра, айни пайтда делегация аъзолари Кобулга етиб борган.
“Кўргазмада иштирок этишдан асосий мақсад — қишлоқ хўжалиги, кончилик, энергетика, таълим, қурилиш, автомобилсозлик, соғлиқни сақлаш, туризм, тўқимачилик ва бошқа қатор йўналишларда фаолият юритаётган маҳаллий ишлаб чиқарувчилар маҳсулотларини намойиш этишдан иборат. Кўргазмада 5 мингдан ортиқ компаниялар, Эрон, Қирғизистон, Ҳиндистондан келган тадбиркорлар иштирок этиши кутилмоқда”, дейилади палата хабарида.
Маълум қилинишича, тадбир доирасида B2B учрашувлар ташкил этилади. Бу иштирокчиларга тўғридан-тўғри бизнес музокаралар олиб бориш, янги шериклар топиш ва ҳамкорликни йўлга қўйиш имконини беради.
Аввалроқ палата Сурхондарё вилояти ва Афғонистоннинг Балх вилояти ўртасида ҳамкорлик бўйича ишчи комиссия йиғилиши ўтказилгани хабар қилганди. Учрашув доирасида экспорт фаолиятига оид ташкилотлар раҳбарлари, тадбиркорлар иштирокида очиқ мулоқот ҳамда ишбилармон доиралар ўртасида B2B форматида музокаралар ўтказилган.
Делегация аъзолари Термиз халқаро савдо марказининг фаолияти, мавжуд имкониятлар ҳамда Афғонистондан олиб келинаётган маҳсулотлар кўргазмаси билан танишган.
Музокаралар якунида Сурхондарё вилояти Савдо-саноат палатаси ва Афғонистон Савдо-саноат палатаси ўртасида ҳамкорлик тўғрисидаги меморандум имзоланган.
