Тошкент шаҳрида вояга етмаган бола дўкон кассасидан 6 миллион 185 минг сўмни ўғирлагани аниқланди. Бу ҳақда Тошкент шаҳар ИИБ ахборот хизмати хабар берди.
Маълум қилинишича, бола дўкон эшигидаги тирқиш орқали ичкарига кириб, кассадаги пулларни олиб чиққан. Тунги хизматни олиб бораётган қўриқлаш хизмати ходимлари унинг шубҳали ҳаракатларини пайқаб, воқеа жойидан узоқлашишга улгурмасидан ушлаган ва ҳолат ҳақида навбатчилик қисмига хабар берган.
Текширувлар давомида гумонланувчи ўғирлаган 6 миллион 185 минг сўм дўкон эгасига тўлиқ қайтарилган.
Ҳолатни ўрганиш чоғида мазкур дўкон ҳамда унинг атрофидаги яна бир қатор савдо шохобчалари қўриқлаш хизмати тизимига уланмагани аниқланган. Шундан сўнг тадбиркорлар билан профилактик тушунтириш ишлари олиб борилиб, уларни қўриқлаш хизматига улаш чоралари кўрилган. Хусусан, ўғрилик содир бўлган дўкон эгаси ҳам қўриқлаш хизмати билан шартнома тузган.
Жиноятнинг фош этилишига ҳисса қўшган ходимлар ички ишлар органлари раҳбарияти томонидан тақдирланган.
