Тошкентда пора олган кадастр бош инспектори, Андижонда ер майдонини ноқонуний сотган фуқаро ушланди. Бу ҳақда Давлат хавфсизлик хизмати хабар берди.
Маълум қилинишича, ДХХ Call-марказига келиб тушган мурожаат асосида хизматнинг Тошкент шаҳар бўйича бошқармаси ва Иқтисодий жиноятларга қарши курашиш департаменти ҳамкорлигида ўтказилган тезкор тадбирда Кадастр агентлигининг Яшнобод туман бўлими бош инспектори учинчи шахс орқали 2 минг доллар олган вақтида унинг ноқонуний ҳаракатига чек қўйилди.
Бош инспектор ўз хизмат мавқейидан фойдаланган ҳолда, маҳаллий фуқаро томонидан ноқонуний ўрнатилган енгил конструкцияли қурилмаларни бузиб ташламаслик ва унга нисбатан жарима қўлламаслик эвазига ушбу пул маблағини талаб қилган.
Андижон шаҳрида яшовчи, 1984 йилда туғилган. фуқаро харидорга Андижон тумани Хакан саноат ҳудудида жойлашган ва давлат захирасида бўлган 40 сотих ер майдонини гўёки “E-auksion” орқали ютиб олганини айтиб, келгусида кадастр тизимидаги танишлари орқали унинг номига расмийлаштириб бериш эвазига 160 минг доллар талаб қилган.
ДХХ, ИИБ ва ИЖҚКД ходимлари ҳамкорлигида ўтказилган тезкор тадбирда у олдиндан 80 минг долларни олган вақтида ушланган.
