Афғонистонлик 25 ёшли Фарҳод Нурий исмли эркак 2025 йил 13 февраль куни ўзининг Мини Cоопер машинасини Германиянинг Мюнхен шаҳри марказидаги Верди Касаба уюшмаси намойишчилари устига катта тезликда ҳайдаган. Оқибатда 37 ёшли аёл ва унинг икки ёшли қизи ҳалок бўлган. Бугун, 6 август куни суд эркакни қотиллик ва қотилликка қасд қилишда айбдор деб топиб умрбод қамоқ жазосига ҳукм қилди.
Билд нашрига кўра, Мюнхен Олий суди афғонистонлик ушбу шахснинг “айби ўта оғир” деб қарор чиқарди. Бу қарор 15 йиллик қамоқ муддатидан сўнг уни шартли равишда муддатидан илгари озод қилиш эҳтимолини сезиларли даражада камайтиради. Бундан ташқари, суд Нурийни иккита қотиллик ва 23 та қотилликка қасд қилиш ҳолати бўйича айбдор деб топди.
2016 йилда Германияга келган Фарҳод Нурий ишида Федерал прокуратура мураккаб сабабларни аниқлади. Маълум қилинишича, ҳужумда ҳам диний, ҳам сиёсий омиллар рол ўйнаган. Бунга ёлғизлик ҳисси ва хавотирлар ҳам қўшилган. Эркакда ҳеч қандай пушаймонлик аломатлари кўринмаган.
