Европа Иттифоқи (ЕИ) 2027 йил 1 ноябргача Россиядан газ олишни бутунлай тақиқлайди. Венгрия ва Словакия қаршилигига қарамай, бугун, 26 январь куни ЕИ Кенгаши Энергетика вазирлари даражасида Брюсселда ушбу қарорни тасдиқлади. Бу ҳақда “Deutsche Welle” хабар берди.
Қайд этилишича, Москва билан яқин алоқаларни сақлаб қолган Будапешт ва Братислава газ тақиқига қарши овоз берган. Венгрия ҳукумати қарор устидан Люксембургдаги Европа Иттифоқи Адлия судига (ECJ) шикоят қилишини эълон қилган.
Қарорга кўра, суюлтирилган газ (LNG) импорти 2026 йил охирига қадар, қувур орқали етказиб бериш эса 2027 йил 30 сентябргача тўхтатилиши керак. Бироқ агар ЕИ мамлакатлари газ омборларини тўлдиришда қийинчиликларга дуч келса, бу муддат 2027 йил 1 ноябргача узайтирилиши мумкин.
Бундан ташқари қабул қилинган низомга кўра, Россия билан янги газ шартномаларини тузишни тақиқлаш кўзда тутилган. Бу янги қонун кучга кирганидан олти ҳафта ўтгач кучга киради.
2024 йилда ЕИга етказиб бериладиган барча газнинг тахминан 19 фоизи Россиядан келган. Россиянинг Украинага қарши уруши ва Россия газини сотиб олишнинг сезиларли даражада камайиши туфайли Россия нефтига деярли тўлиқ эмбарго қўлланилганига қарамай, ЕИ 2024 йилда Россия бюджетига ойига тахминан 1,5 миллиард евро тўлаган.
