Аргентиналик футболчи Лионель Месси 2026-йилги Жаҳон чемпионати олдидан спорт формасини сақлаб туриш мақсадида вақтинча фаолиятини Туркия чемпионатида давом эттириши мумкин. Туркиянинг нашри Fotomac нашри хабарига кўра, аргентиналик футболчи 4 ойлик шартнома асосида “Галатасарой”га ўтиши мумкин. Манбада ёзилишича, клуб Месси билан қисқа муддатли шартнома имзолашга тайёр ва уни имкон қадар тезроқ жамоага қўшиб олишни истамоқда.
“Галатасарай” ёзда Виктор Осимҳен, Лерой Сане ва Илкай Гюндўған каби футболчилар билан шартнома имзоалди. Ҳозирда истанбулликлар Туркия чемпионатида 29 очко билан етакчилик қилмоқда. Агар Месси ҳам қўшилса, клубнинг ҳужум чизиғи янада кучайиши ҳамда у бир неча ой давомида юқори спорт формасини сақлаб турган ҳолда Жаҳон чемпионатига тайёргарлик кўриши мумкинлиги тахмин қилинмоқда.
“Интер Майами” узоқ вақтдан бери чемпионатдаги танаффус пайтида Мессини бошқа клубга ижарага бериш имкониятини кўриб чиқмоқда. Аввалига клуб раҳбарияти Саудия Арабистонидаги жамоалардан бирига мурожаат қилган, аммо мамлакат спорт бошқармаси бу таклифни қатъиян рад этган ва миллий чемпионатни машғулот масканига айлантирмаслигини билдирган.
38 ёшли Месси 2023-йилдан бери “Интер Майами” сафида тўп суради. У фаолияти давомида “Барселона” ва “Пари Сен-Жермен” клубларида ҳам ўйнаган. Аргентиналик юлдуз саккиз карра “Олтин тўп” соҳиби бўлиб, миллий терма жамоаси билан Жаҳон чемпионати (2022), Америка Кубоги (2021, 2024), Финалиссима (2022) ва Олимпиада (2008) ғолиблигини қўлга киритган.
Маълумот учун, 2026-йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
