Туркиянинг Истанбул шаҳрида содир бўлган йўл-транспорт ҳодисаси оқибатида бир оила ҳалок бўлди. Бу ҳақда Hurriyet нашри хабар берди.
Маълум қилинишича, фожиа 11 июнь куни эрталаб Чекмекўй тумани ҳудудидан ўтувчи Шимолий Мармара автомагистралида юз берган. Сабиҳа Гўкчен аэропортидан қайтаётган 29 ёшли Садик Гунден бошқарувидаги енгил автомобил шу йўналишда ҳаракатланаётган юк машинасига орқа томондан урилган.
Тўқнашув оқибатида автомобил юк машинаси остига кириб кетган. Машина ичида қолиб кетган ҳайдовчи Садик Гунден, унинг Ўзбекистон фуқароси бўлган 31 ёшли турмуш ўртоғи Азиза Ҳотамова Гунден ҳамда 2 ойлик ўғли Тимурхон Гунден воқеа жойида ҳалок бўлган.
Ҳодиса жойига етиб келган қутқарувчилар учала жасадни автомобилдан чиқариб олган. Маҳаллий ОАВ маълумотларига кўра, эр-хотин тўрт йилдан олдин турмуш қурган, уларнинг яна 3 ёшли Саъид исмли фарзанди ҳам бор. Бола воқеа содир бўлган пайтда ота-онаси билан бирга бўлмаган.
Хабарда қайд этилишича, ҳалок бўлган 2 ойлик Тимурхон яқинда суннат қилинган бўлиб, яқин кунларда унинг суннат тўйи ўтказилиши режалаштирилган эди.
