11 июнь куни сайёҳларни Туркиянинг Истанбул шаҳридан Антальяга олиб борган самолёт аэропортда радар устунига бориб урилди. Бу ҳақда “Akdeniz Manset” хабар берди.
Газетанинг хабар беришича, Анталья аэропортига қўнаётган самолёт номаълум сабабларга кўра тўхтаб туриш жойида устунга бориб урилган. Зарба аэропорт фаолиятида қисқа муддатли узилишларни келтириб чиқарган, ҳодиса жойига тиббиёт ва аэропорт бригадалари юборилган.
“Йўловчилар ва экипаж аъзолари жабрланмаган. Самолёт ва у бориб урилган устунга моддий зарар етган. Ҳодиса юзасидан тегишли органлар томонидан суриштирув ишлари бошланди, авариянинг аниқ сабаби техник экспертизалар якунланганидан кейин аниқланади”, дейилади хабарда.
“Turkish Airlines” авиакомпаниясининг маълум қилишича, самолёт бортида 267 нафар йўловчи бўлган. Уларнинг барчаси эвакуация қилинган. Ҳодисадан сўнг тармоқда самолёт салонидан олинган кадрлар пайдо бўлди. Уларда тўқнашув лаҳзасида салон ичида саросима юзага келганини кўриш мумкин. Баъзи аёллар баланд овозда йиғлаган, салонда эса кислород ниқоблари осилиб турибди.
“Самолётнинг қайсидир қисми узилиб кетди. Аёллар ваҳимага тушишяпти”, дейди йўловчилардан бири.
Унинг айтишича, йўловчиларни зарба овози ва самолётнинг учиб кетган бўлаклари жуда қаттиқ қўрқитиб юборган. Маълумотларга кўра, тўқнашув оқибатида бир нафар йўловчи жароҳат олган.
“Биз енгил тан жароҳати олган йўловчилардан бирининг соғлиғи яхши экани ҳақида маълумот олдик”, дейди авиакомпаниянинг жамоатчилик билан алоқалар бўйича катта вице-президенти Яҳё Устун.
Ҳозирда ҳодиса юзасидан техник текширув ишлари бошланган.
