Россия 1 ноябрь куни Украинада элита ҳарбийларини тақдирлаш маросимида ракета учирди. Оқибатда бир нечта украиналик аскар ҳалок бўлди ва яраланди. Бу ҳақда The Telegraph хабар берди.
Украина расмийлари ҳодиса юзасидан “эҳтимолий бепарволик” бўйича тергов бошлаган. Ҳужумда неча нафар аскар ҳалок бўлгани номаълум. Украиналик журналист Дмитрий Святненконинг сўзларига кўра, унинг акаси — элита дрон оператори маросим пайтида ҳалок бўлган. 43 ёшли Владимир Святненко 35-алоҳида денгиз пиёдалари бригадасида хизмат қилган эди.
“У ва унинг сафдошлари мукофот олиш учун саф майдонига йиғилган эди. Энг яхшилари тўпланганди. Бригаданинг энг яхши учувчилари ва пиёда аскарлари қўмондонлик тартибида тўпланганида очиқ жойда баллистик ракета учиб келди. Бепарволик яна такрорланди. У (акам) Кринки, Курахове, Маринка ва Красногоровка жангларида дўзахни бошидан кечирган эди… Уни руслар ўлдирди, лекин жанг майдонида эмас”, деган Святненко.
Ҳужум оқибатида 35-алоҳида денгиз пиёдалари бригадасида хизмат қилган украиналик фотограф ва ҳарбий хизматчи Костиантин Ҳузенко ҳам ҳалок бўлган. Бундан ташқари, яқин атрофдаги қишлоқларда тўрт нафар тинч аҳоли, жумладан 11 ва 14 ёшли болалар ҳам ўлган, яна олти киши яраланган.
Украина давлат тергов бюроси (СБИ) ҳаво тревогаси пайтида хавфсизлик қоидаларига риоя қилинганми ёки йўқлигини, ҳарбийларга базада тегишли бошпана берилгани ёки йўқлигини текширмоқда.
Маълумот учун, 2023 йил ноябрь ойида Запорожье вилоятида ўтказилган тақдирлаш маросимида ҳам Россия ракетаси ҳужум қилганди, оқибатда 19 нафар украиналик ҳарбий ҳалок бўлган. Ўшанда Украина президенти Владимир Зеленский бу фожианинг олдини олиш мумкин бўлганини айтган.
