Белгияда 18 июндан 16 августга қадар давом этган иссиқ тўлқинлари 2 935 нафар инсоннинг ўлимига сабаб бўлган. Бу кутилган кўрсаткичдан 22,6 фоизга кўп экани мамлакат жамоат саломатлиги органи — Sciensano ҳисоботида маълум қилинди.
Энг юқори ўлим кўрсаткичи 18 июндан 3 июлгача қайд этилган. Ушбу даврда 2 035 та ортиқча ўлим кузатилган бўлиб, бу кутилганидан 48,8 фоиз юқори.
Бу вақтда мамлакатда 10 кун давомида ҳарорат қарийб 30°C, уч кун эса 35°C атрофида бўлган. Тунлар ҳам жуда иссиқ кечган.
Сўнгги икки иссиқ даврда ҳам ортиқча ўлимлар қайд этилган: 4–17 июль кунлари 535 та, 28 июль–16 август оралиғида эса 365 та.
Иссиқлик билан боғлиқ ўлимларнинг аксарияти 65 ёшдан катта инсонлар ҳисобига тўғри келган. Бироқ Sciensano ёшлар орасида ҳам ортиқча ўлим ҳолатлари кузатилганини таъкидлади.
БМТнинг об-ҳаво агентлиги маълумотларига кўра, иқлим ўзгариши туфайли дунёда экстремал иссиқ даврлар тобора тез-тез, кучли ва узоқроқ давом этмоқда.
