Ироқ ғарбида АҚШ ҳарбий-ҳаво кучларига тегишли ёнилғи қуйиш самолёти ҳалокатга учраши оқибатида бортдаги олти нафар экипаж аъзосидан тўрт нафари ҳалок бўлди. Бу ҳақда АҚШ Марказий қўмондонлиги (CENTCOM)га таяниб, BBC хабар берди.
КC-135 Stratotanker русумли самолёт билан боғлиқ кўнгилсиз ҳодиса 12 март куни маҳаллий вақт билан соат 19:00 ларда содир бўлган. CENTCOM дастлабки баёнотида самолёт душман ёки иттифоқчи кучларнинг ўқи оқибатида уриб туширилмаганини таъкидлади.
Ҳозирда қидирув-қутқарув ишлари давом этмоқда. Ҳалок бўлганларнинг шахси уларнинг яқинларига хабар бериш учун 24 соат давомида сир тутилмоқда. Мазкур ҳаво кемаси АҚШнинг Эронга қарши давом этаётган амалиётларига жалб қилинган икки самолётдан бири эди; иккинчи самолёт эсон-омон қўнишга муваффақ бўлган.
АҚШ ҳарбийлари ҳалокат “дўстона ҳаво ҳудуди”да юз берганини айтаётган бўлса-да, воқеа содир бўлган ҳудудда Эрон тараф шиа гуруҳлари фаол ҳисобланади. Эрон ҳарбийлари давлат телеканали эфирида иттифоқчилар гуруҳи самолётни ракета билан нишонга олганини даъво қилди.
