Германияда рақамли ҳуқуқларни ҳимоя қилувчи HateAid ташкилоти Meta компанияси ва унинг ақлли кўзойнакларини сотувчи қатор компаниялар устидан жиноий шикоят билан мурожаат қилди. Бу ҳақда Reuters хабар берди.
Ташкилотга кўра, Meta’нинг Ray-Ban Meta Wayfarer ақлли кўзойнаклари одамларни уларга сездирмасдан тасвирга олиш имконини бериши ва шу орқали Германиянинг шахсий ҳаёт дахлсизлигини ҳимоя қилишга оид қонунларини бузиши мумкин.
«Ақлли кўзойнаклардан қочиб қутулишнинг иложи йўқ. Сиз исталган вақтда видеога олинишингиз ва кейин интернетда намойиш этилишингизни кутишингизга тўғри келади», — деди HateAid бошқарувчи директори Жозефин Баллон.
HateAid Meta, EssilorLuxottica, Ray-Ban, Fielmann, Apollo-Optik, Mister Spex ва MediaMarkt юзасидан Франкфуртдаги рақамли жиноятларни таъқиб қилиш бўлими — ZIT’га мурожаат қилган.
ZIT шикоят келиб тушганини тасдиқлаб, кенгроқ тергов ўтказиш учун етарли асослар бор-йўқлигини аниқлаш мақсадида дастлабки текширув ўтказилишини маълум қилди.
Германия Федерал тармоқ агентлигига кўра, яширин аудио ёки видео ёзув олиш имконини берувчи қурилмалар тақиқланган. Бироқ тасвирга олиш функцияси, масалан, махсус ёруғлик сигнали орқали аниқ кўриниб турса, ақлли кўзойнакларга эгалик қилиш, уларни импорт қилиш ёки сотиш тақиқланмайди.
HateAid бундай қурилмалар деярли сезилмайдиган кузатув технологиясини оддий кундалик буюм кўринишида яшириш имконини беришидан хавотир билдирган.
