Германия ҳарбий-денгиз кучлари Шимолий Атлантикада Исроилда ишлаб чиқарилган Лора баллистик ракетасини муваффақиятли синовдан ўтказди. Бу ҳақда Tagesspiegel хабар берди.
Ракета 2 сентябрь кечаси Ирландия ва Исландия ўртасидаги денгиз ҳудудига жойлаштирилган икки немис фрегатидан бири орқали учирилган. Германия ҳарбий-денгиз кучлари бош инспектори, вице-адмирал Ян-Кристиан Как синов натижаларидан мамнунлигини билдириб, бу Германия ва унинг иттифоқчиларини ҳимоя қилиш ҳамда денгиздаги мудофаа салоҳиятини кучайтиришда муҳим қадам эканини айтди.
Синовга тайёргарлик ишлари махфий олиб борилган. Israel Aerospace Industries компанияси томонидан ишлаб чиқарилган Лора ракетаси 500 километргача масофани босиб ўтиши мумкин. Агар Германия ушбу тизимни сотиб олишга қарор қилса, у Бундесвер қуролланишидаги биринчи баллистик ракетага айланади.
Ишлаб чиқарувчи маълумотига кўра, Лора юқори аниқликдаги зарбалар учун мўлжалланган бўлиб, мобил ёки денгиз платформаларидан стратегик нишонларга зарба бериш имконини беради. Ракета баллистик траектория бўйлаб юқори тезликда ҳаракатланиб, нишонга тик бурчак остида яқинлашади.
Айни пайтда Германия армияси 500 километрдан ортиқ масофага учишга қодир Taurus қанотли ракеталаридан ҳам фойдаланади. Улар қирувчи самолётлардан учирилади ва асосан мустаҳкамланган нишонларни йўқ қилиш учун мўлжалланган.
Германия ҳукумати узоқ масофали зарба салоҳиятини ошириш мақсадида АҚШдан 2500 километргача масофага учадиган Tomahawk ракеталарини сотиб олишни ҳам режалаштирмоқда. Шунингдек, Берлин модернизация қилинган Taurus ракетасини ишлаб чиқиш ва Европа давлатлари билан янги узоқ масофали ракета тизимларини яратиш устида ишламоқда.
