Исроилда ҳантавирус билан касалланишнинг илк ҳолати аниқланди. Бу ҳақда The Jerusalem Post хабар берди.
Маълум қилинишича, бемор бир неча ой олдин Шарқий Европага саёҳат қилган ва касалликни ўша ерда юқтириб олган бўлиши мумкин. Унда симптомлар пайдо бўлгач, тиббий ёрдамга мурожаат қилган. Дастлаб антитаначалар бўйича ўтказилган тест ҳантавирус белгиларини кўрсатган, кейинчалик PZR-тести касалликни расман тасдиқлаган.
Беморнинг аҳволи барқарор деб баҳоланмоқда. У интенсив терапия ёки қатъий изоляцияга муҳтож эмас. Унинг шахси ва қайси шифохонада даволанаётгани очиқланмаган. Аниқланган вирус штамми Атлантика океанидаги MV Hondius круиз лайнерида авж олган штаммдан фарқ қилади. ЖССТ маълумотларига кўра, мазкур лайнерда ҳантавирус туфайли нидерландиялик эр-хотин ва германиялик эркак вафот этган, камида яна саккиз киши касалланган.
Бортида 150 га яқин одам бўлган MV Hondius кемаси Испанияга йўл олган ва 10 май куни Tenerife оролига етиб бориши керак. Ҳозирда кемада вирус аломатлари бўлган йўловчилар йўқлиги айтилмоқда.
Reuters хабарига кўра, бир қатор давлатлар касаллик тарқалишининг олдини олиш учун кема Кабо-Верде қирғоқларига етиб келишидан олдин уни тарк этган йўловчиларни кузатмоқда. Вирус тарқалиши ҳақидаги хабарлар пайдо бўлишидан аввал 40 га яқин одам Санта-Элена портида кемадан тушган. Уларнинг кўпчилиги қаердалиги ҳозирча номаълум.
Ҳантавирус — одамга кемирувчилардан, асосан, уларнинг вирусланган ажралмалари орқали юқадиган вируслар гуруҳи. Улар ўпка ёки буйрак шикастланиши каби оғир касалликларни келтириб чиқариши мумкин. Касаллик иситма, бош ва мушак оғриқлари, кўнгил айниши ҳамда чарчоқ каби белгилар билан кечади. Ҳантавирус юққанига шубҳа туғилса, дастлабки симптомлардан 72 соат ўтгач, такрорий таҳлил топшириш тавсия этилади. Вирусга қарши махсус даво йўқ, беморларга қўллаб-қувватловчи терапия қўлланади.
