Туркия Диний жамғармаси (ТДВ) ташаббуси билан 11–12 ноябрь кунлари Истанбулда Халқаро Ғазо гуманитар саммити бўлиб ўтади. Бу ҳақда Anadolu нашрихабар берди.
Тадбирнинг асосий мақсади — Ғазо секторидаги давом этаётган гуманитар инқирозга эътибор қаратиш ва халқаро бирдамликни кучайтиришдир. Жамғарма хабарига кўра, саммитда Туркия Диний ишлар бошқармаси раҳбари Сафи Арпагуш ҳамда давлат идоралари, халқаро ташкилотлар, нодавлат ташкилотлар, инсон ҳуқуқлари фаоллари, олимлар ва ОАВ вакиллари иштирок этади.
Тадбирда сўнгги икки йилдан бери Ғазода давом этаётган оғир инқирозга барқарор ва узоқ муддатли ечим топиш йўллари муҳокама қилинади. Иштирокчилар вайрон бўлган инфратузилма, соғлиқни сақлаш, таълим ва уй-жой тизимларини тиклаш зарурати, шунингдек, миллионлаб жабрланган фуқароларга ёрдам кўрсатишнинг самарали механизмларини ишлаб чиқиш ҳақида фикр алмашади.
ТДВ бош директори Изани Туран саммит Ғазо халқини қўллаб-қувватлаш ва урушдан вайрон бўлган ҳудудда ҳаётни тиклашга хизмат қилишини таъкидламоқда. Унинг сўзларига кўра, тадбир инсонпарварлик ҳаракатларини глобал даражада бирлаштирувчи амалий ва барқарор ташаббусларга замин яратади.
Туран шунингдек, саммитнинг асосий мақсади — Ғазони қайта тиклаш ва ривожлантириш бўйича йўл харитасини ишлаб чиқиш, гуманитар, ОАВ ва молиявий ташкилотлар ўртасида ҳамкорлик платформасини яратиш ҳамда барқарор ёрдам манбаларини таъминлаш эканини қайд этди.
Унинг фикрича, саммит ёрдам ташкилотлари ва давлат тузилмалари ўртасидаги ҳамкорликни мустаҳкамлаш, инсонпарварлик ёрдамининг самарадорлигини оширишга ҳам хизмат қилади.
“Бу халқаро форумни ўтказиш Туркиянинг фаластин халқи олдидаги инсоний ва ахлоқий масъулиятини намоён этади”, деган Туран.
