Бугун, 11 ноябрь куни Озарбайжондан Туркияга учаётган C-130 ҳарбий-транспорт самолёти Грузия ва Озарбайжон чегарасига яқин ҳудудда ҳалокатга учради. Бу ҳақда Туркия Мудофаа вазирлиги хабар берди.
Вазирлик самолёт бортида неча киши бўлганини очиқламаган. Фақат Озарбайжон ва Грузия расмийлари билан ҳамкорликда қидирув-қутқарув ишлари йўлга қўйилгани ҳақида хабар берган.
Озарбайжон Мудофаа вазири Зокир Ҳасанов самолёт ҳалокати муносабати билан Туркия Миллий мудофаа вазири Яшар Гулерга ҳамдардлик билдирган.
“Аллоҳдан ҳалок бўлганларнинг руҳини ором топишини сўрайман, уларнинг яқинларининг ғамини баҳам кўраман ва чуқур таъзия билдираман”, дейилади баёнотда.
Туркия ҳарбий-транспорт самолётининг ҳалокати ҳақида биринчи бўлиб “Imedinews” хабар берган. Грузия нашри, шунингдек, ҳалокат жойидан олинган кадрларни ҳам эълон қилган. Унда самолёт деярли ерга тик қулаб тушаётгани ва ортидан тутун изи қолдираётгани акс этган.
Маълумот учун, Lockheed C-130 Hercules – бу АҚШнинг Lockheed Martin компанияси томонидан ишлаб чиқилган ўрта ва узоқ масофаларга мўлжалланган ҳарбий-транспорт самолёти. У тупроқ йўлакларга қўниш ва улардан учишга, ҳарбий юклар, шахсий таркиб ва жароҳатланганларни ташишга мўлжалланган. CNN Türk маълумотига кўра, ушбу турдаги самолёт Туркия Қуролли кучлари томонидан турли миссияларда фаол фойдаланилади.
