Миллиардер Уоррен Баффет 1,3 миллиард доллардан ортиқ маблағни хайрияга йўналтириш ниятида эканини ва 2025 йил охирида Berkshire Hathaway компанияси бош директори лавозимини тарк этишини эълон қилди. Бу ҳақда у ўз акциядорларига йўллаган мактубида маълум қилди.
У энди анъанавий йиллик мурожаатларни ёзишни ва компания йиғилишларида қатнашишни тўхтатишини билдирган. Шунингдек, Баффет ўзини “умуман олганда яхши” ҳис қилаётганини, бироқ активларини фарзандларига топшириш жараёнини тезлаштирмоқчи эканини ва бойлигининг хайрия мақсадларида ишлатилишини таъминлаш тизимини мустаҳкамлаш ниятида эканини айтган.
“Ҳаракатларим секинроқ, ўқиш эса бироз қийинлашган бўлса-да, мен ҳафтасига беш кун офисда ажойиб инсонлар билан ишлайман”, деб ёзган у.
Тадбиркорнинг сўзларига кўра, унинг фарзандлари “етуклик ва ақл-заковати” билан меросни тўғри бошқаришга қодир.
Уоррен Баффет яна бир бор Грег Абель унинг вориси бўлишини тасдиқлаган. У акциядорлар Грегга ўзига ва узоқ йиллик ҳамкори Чарльз Мангерга бўлган ишончдек ишонч билдириши лозимлигини таъкидлаган.
“Мен сизнинг ва менинг жамғармаларимизни бошқариш учун Грегдан бошқа бирорта бош директор, маслаҳатчи, олим ёки давлат арбобини танлай олмасдим”, дейилади мактубда.
Ҳужжатга кўра, 1,5 миллионта Б синф акцияси Сьюзан Томпсон Баффет фондига, яна 400 мингтадан акция тадбиркорнинг уч фарзандига тегишли фондларга топширилади.
Berkshire Hathaway конгломерати Geico, Duracell ва Dairy Queen каби ўнлаб компанияларга эгалик қилади. Унинг 283 миллиард долларлик портфелининг асосий қисмини Apple, American Express, Bank of America, Coca-Cola ва Chevron акциялари ташкил этади. 95 ёшли Уоррен Баффетнинг бойлиги ҳозирда тахминан 150 миллиард доллар деб баҳоланмоқда.
