Каталониянинг “Барселона” клуби ҳамда Польша терма жамоаси ҳужумчиси Роберт Левандовски фаолиятини Саудия Арабистони чемпионатида давом эттириши мумкин. Футболчига ушбу мамлакатнинг тўртта клуби жиддий қизиқиш билдирмоқда. Бу ҳақда Mundo Deportivo нашри хабар берди.
Унга кўра, “Ал-Ҳилол”, “Ан-Насср”, “Ал-Аҳли” ва “Ал-Иттиҳод” клублари 2026-йилнинг ёзида “Барселона” ҳужумчиси Роберт Левандовскини сотиб олиш имкониятини кўриб чиқмоқда. Саудияликлар тажрибали форвардга 25—35 миллион евро атрофида маош таклиф қилишни режалаштирмоқда.
Бу трансфер Саудия Арабистонининг суверен инвестиция жамғармаси ташаббуси билан амалга оширилаётган бўлиб, Vision-2030 лойиҳасининг бир қисми ҳисобланади.
Футболчининг клуб билан амалдаги шартномаси 2026 йил июнигача мўлжалланган бўлиб, томонлар ҳозирча уни узайтириш бўйича бир қарорга келмаган. Аввалроқ каталонияликлар Робертнинг ўйинида пасайиш кузатилгани ҳамда олдингидек самарадорлик кўрсата олмаётгани ортидан янги шартнома имзолашни режалаштирмаётгани ҳақида хабарлар тарқалганди.
