“Барселона” собиқ ҳужумчиси, ҳозирда “Интер Майами” шарафини ҳимоя қилаётган Лионель Месси каталонияликларинг янгиланган “Камп Ноу” стадионига яширинча ташриф буюрди. Бу ҳақда Marca нашри хабар берди.
Унга кўра, “Барселона” вакиллари Мессининг кутилмаган ташрифидан ҳайратда қолган. Аргентиналик юлдуз 9 ноябрь куни кечқурун стадионда пайдо бўлган, бироқ унинг ташрифи ҳақида клубдаги ҳеч ким хабардор бўлмаган. У ижтимоий тармоқларда “Камп Ноу”даги суратларини жойлаштиргач, пост тезда тарқалди. Мазкур ҳолат клуб раҳбариятини ҳайратда қолдирган. Маълум бўлишича, Месси бу ташрифи ҳақида ҳеч кимни олдиндан огоҳлантирмаган. Футболчи манзилга етиб боргач, “Камп Ноу”га кириш учун хавфсизлик хизмати ходимларидан рухсат сўраган.
“Кеча кечқурун бутун вужудим билан соғинган жойимга қайтдим. Бу ерда ўтказган онларим ҳаётимдаги энг бахтли дамлар эди. Сизлар эса мени бундан ҳам бахтлироқ ҳис қилгансизлар. Умид қиламанки, бир куни бу ерга яна қайтаман. Ахир футболчи сифатида бу стадион билан хайрлашиш насиб этмаганди”, деб ёзди Месси.
Эслатиб ўтамиз, Месси 2003–2021-йиллар оралиғида “Барселона” шарафини ҳимоя қилган. Аммо 2021-йилда клуб молиявий қийинчиликлар ортидан футболчи билан янги шартнома имзоламади. Шу боис, каталонияликлар Лео билан матбуот анжуманида хайрлашди.
Месси фаолияти давомида 10 марта Испания чемпионлигини, 4 марта Чемпионлар Лигаси ғолиблигини қўлга киритган. Аргентиналик футболчи клуб тарихидаги энг яхши тўпурар ҳисобланади — 672 та гол. 2011/2012-йилги мавсумда эса у Ла Лигада 50 та гол уриб, лига рекордини ўрнатган. 2021-йилда Месси “Барселона”ни тарк этиб, “Пари Сен-Жермен” клубига эркин агент сифатида ўтди. Ҳозирда ҳужумчи АҚШнинг “Интер Майами” жамоаси сафида фаолиятини давом эттирмоқда.
