АҚШнинг “Amazon” компанияси 14 минг ходим ишдан бўшатилишини маълум қилди.
Технология гиганти кенг кўламда штат қисқаришини бюрократияга қарши кураш, айни пайтда устувор аҳамият касб этган лойиҳаларни давом эттириш ва ресурсларни қайта тақсимлаш мақсади билан изоҳлаган.
“Amazon” вакилига кўра, қисқартиришга тушган аксар ходимлар 90 кун давомида компания ичида янги лавозим қидириб кўриш имконига эга бўлади. Улар, шунингдек, моддий рағбатлантирилиши кўзда тутилган.
Ширкат айнан қайси йўналишдаги кадрлар ишдан бўшатилишини очиқламаган. Аммо матбуот хабарига кўра, булут технологиялар, чакана савдо, коммуникациялар ва қурилмалар йўналишида фаолият юритувчи ходимларнинг баҳридан ўтилиши кутилмоқда.
“Amazon” ширкати 2022 йилда ҳам 27 минг ходимни ишдан бўшатганди.
Сўнгги қисқартиришлар сунъий интеллектдан кенг фойдаланиш билан боғлиқдир. Жорий йил июнь ойида “Amazon” бош директори Энди Джасси сунъий интеллект технологияларидан истифода этилиши ортидан иш жараёни автоматлашувини қайд этган эди.
Октябрь ойи бошида эса “The New York Times” газетаси компания ярим миллионга яқин мутахассисни роботларга алмаштиришни режалаштираётгани ҳақида ёзганди.
Жорий йил иккинчи чораги статистикасига мувофиқ, “Amazon” ширкатида дунё бўйлаб 1,55 миллион киши ишлаган. Уларнинг 350 минги офис ходимларидир. Ширкатнинг бозор қиймат 2,4 триллион доллардан ошган.
АҚШда фаолият юритиб келаётган дастурчи ва журналист Беҳзод Мамадиев ҳам “Amazon”даги қисқартиришлар СИ билан боғлиқ эканини тасдиқлади.
“Amazon” компанияси бугун 14 минг ходимини ишдан бўшатди. Аксарияти дастурчилар, яхши маош оладиган ходимлар. Ишидан айрилганлар орасида танишларим ҳам бор. Сунъий интеллектнинг таъсири бу. Ҳозир кодни асосан сунъий интеллект ёзяпти. Биз унга топшириқ берамиз, ёзган кодини текширамиз, хатоси бўлса тузатамиз. Қўлда нолдан бошлаб код ёзадиган даврлар тугади. Сунъий интеллект иш самарадорлигини 10 баробаргача оширяпти. Натижада бу ходимлар сонини қисқартиришга ҳам сабаб бўляпти”, – деб ёзди у Телеграмдаги саҳифасида.
СИ жамият ҳаётига фаол кириб бориши сабаб кўплаб йўналишларда иш ўрни қисқариши кутилмоқда.
2024 йилда дунё бўйича технология секторида 280 991 ходим ишдан бўшатилди. Жорий йилда ҳам катта кўламда қисқаришлар рўй бериши айтилмоқда.
Аввал хабар берганимиздек, “Microsoft” генератив сунъий интеллектнинг меҳнат бозорига таъсири юзасидан тадқиқот натижаларини эълон қилганди. Унга кўра, ахборот, ёзув ишлари ва коммуникациялар билан боғлиқ касблар эгаларига сунъий интеллект энг кўп хавф солмоқда. Энг заиф касблар гуруҳига таржимонлар, тарихчилар, ёзувчилар, муҳаррирлар, техник ёзувчилар ва data-scientists (бизнес ечимлари учун маълумотлар билан ишловчилар) киритилган.
