Кения президенти Уильям Руто украиналик ҳамкасби Владимир Зеленскийдан жанг ҳаракатлари ҳудудида асирга тушган кенияликларни озод этишни илтимос қилди. У суҳбат якунларини ўзининг X ижтимоий тармоғидаги саҳифасида эълон қилди.
Рутонинг айтишича, суҳбат давомида у “ёш кенияликлар Украина ҳудудидаги жанг ҳаракатларида иштирок этиш учун ноқонуний жалб қилингани” ҳақидаги ташвишини билдирган.
“Мен президент Зеленскийдан Украинада қамоқда сақланаётган ҳар қандай кенияликни озод қилишга кўмаклашишни сўрадим”, — деди Руто.
Бундан олдин Украина ташқи ишлар вазири Андрей Сибига махсус операция ҳудудида Африканинг 36 мамлакатидан камида 1436 нафар фуқаро Украина Қуролли кучларига қарши жанг олиб бораётганини маълум қилганди. Унинг айтишича, бу кўрсаткич янада юқори бўлиши мумкин. Гап фақат Россия Федерацияси қуролли кучлари сафида аниқланган ҳарбий хизматчилар ҳақида бормоқда.
4 ноябрь куни Германиянинг Die Welt газетаси манбаларга таяниб, 2 мингга яқин колумбиялик Россия қўшинларига қарши шартнома асосида жанг қилиш учун Украинага киргани ҳақида хабар берганди.
