Дунё океанларида тахминан 1 миллиард баррел нефть тўпланиб, қолди, уларнинг аксарияти санксиялар остидаги давлатлардан келган. Бу ҳақда Bloomberg хабар берди.
Ёз охиридан бери танкерлардаги нефть миқдори сезиларли даражада ошган. Ушбу ўсишнинг 40 фоизигача бўлган қисми Россия, Венесуэла ва Эрон нефтига (ёки келиб чиқиши номаълум нефтга) тўғри келади. Энг паст баҳолашларда ҳам улуш 20 фоиздан кам эмас. Бу эса учала давлатнинг умумий глобал нефть қазиб олишдаги улушидан (тахминан 17 фоиз) кўпроқдир.
Тўпланган нефтьнинг катта қисми Россияга тегишли. Сўнгги ҳафталарда унинг денгиз орқали жўнатмалари кўпайган. Бир томондан Москва ОПЕК билан келишув доирасида қазиб олишни оширмоқда, иккинчи томондан Украинадан ҳужумлар хавфи боис нефтнинг бир қисми экспорт терминалларига йўналтирилган бўлиши мумкин.
Шу билан бирга, санкциялар туфайли баъзи давлатлар ўз портларида нефть ортилган танкерларни қабул қилишдан бош тортмоқда. Россия нефти ортилган кемалар эса ҳуқуқий ноаниқликлар сабабли лангар ташлашга мажбур.
Август ойининг охиридан буён танкерлардаги Россия нефти ҳажми кескин ошиб, октябрь охирига келиб, деярли 390 миллион баррелга етди. Clarksons Securities таҳлилчилари ҳам бундай нефть ҳажмининг ўсишини Ғарб санкцияларининг кучайтирилиши билан боғламоқда, шу сабабли Россия нефтини портларда тушириш имкони йўқ.
“Танкерлардаги нефтнинг денгизда тўпланиб қолиши унинг ҳеч қачон сотилмаслигини англатмайди. Бироқ унинг талаб қилинмаётган ҳажмининг ўсиши келгуси ойларда нефть нархлари динамикасига таъсир кўрсатиши мумкин”, деб ҳисоблайди трейдерлар.
