Самарқандда трансчегаравий уюшган наркожиноий гуруҳ аъзолари катта миқдордаги гиёҳвандлик воситалари билан қўлга олинди. Бу ҳақда Ички ишлар вазирлиги хабар қилди.
Қайд этилишича, Самарқанд шаҳрида Nexia-3 русумли автомашина ЙПХ ходимлари томонидан текширилганда, ҳайдовчи автомобилни қолдириб қочиб кетган. Автомашина эгаси ушланиб, шахсига аниқлик киритилган. Шундан сўнг машина салонида ўриндиқ орқа чўнтагидан полиэтилен пакетга ўралган, оғирлиги 185,35 грамм бўлган опий гиёҳвандлик воситаси аниқланиб, расмийлаштириб олинган.
Машинада йўловчи сифатида кетаётган 1995-йилда туғилган шахс билан тезкор суриштирув ишлари олиб борилиб, унинг вақтинча яшаш манзили кўздан кечирилганда, 1 килограмм оғирликдаги опий топилди. Ҳайдовчи эса гиёҳвандлик воситасини таниши бўлган 1981-йилда туғилган фуқародан олгани маълум бўлди.
Тадбирлар Ургут туманида давом эттирилиб, олинган тезкор маълумотларга асосан ҳайдовчи танишининг яшаш хонадони холислар иштирокида текширилганда республика ҳудудига ноқонуний айланма йўллар билан олиб кирилган беш дона мармар тошлар ичида 18 килограмм 232 грамм опий аниқланди.
Шу билан бирга, 1992-йилда туғилган Эрон Ислом Республикаси фуқароси вақтинча фойдаланиб келаётган омбор кўздан кечирилиб, у ердан ҳам мармар тошлар орасига яширилган 21 килограмм 750 грамм опий топилди.
Ўтказилган тезкор қидирув тадбирлари доирасида қўшни республикалардан турли айланма йўллар орқали мармар тошлар сифатида ниқоблаб олиб кирилишга эришилган 205,835 дозага тенг бўлган, 41 килограмм 162 грамм оғирликдаги опий гиёҳвандлик воситаси аниқланди ҳамда трансчегаравий уюшган наркожиноий гуруҳ аъзолари фаолиятига чек қўйилди.
