Исроил бош вазири Биньямин Нетаньяху 24 декабрь куни мамлакат бошқа давлатларга қарамликни камайтириш мақсадида ўзининг мустақил қурол саноатини ривожлантириш учун 350 миллиард шекел (110 миллиард доллар) сарфлашини маълум қилди. Бу ҳақда Al Arabiya хабар берди.
Янги учувчиларни тайёрлаш маросимида сўзга чиққан Нетаньяху Исроил ўзини мустақил равишда қуроллантиришга интилаётганини таъкидлади.
“Биз зарурий воситаларни сотиб олишда давом этамиз, шу билан бирга ўзимизни мустақил қуроллантирамиз. Давлат бутунлай мустақил бўла оладими-йўқми, билмайман, лекин зарур қуроллар имкон қадар кўпроқ Исроилнинг ўзида ишлаб чиқарилишига интиламиз. Мақсадимиз ҳар қандай томонга, жумладан, иттифоқчиларга бўлган қарамликни ҳам камайтиришдир”, деди бош вазир.
ҲАМАС сулҳни бузганликда айбланди
Нетаньяху, шунингдек, фаластинлик ҲАМАС гуруҳини Ғазо секторидаги сулҳ келишувини бузганликда яна бир бор айблади. Бу Рафаҳ шаҳрида портловчи қурилма оқибатида исроиллик офицернинг жароҳатлангани билан изоҳланмоқда. Маълум қилинишича, Ғазо жанубидаги Рафаҳ ҳудудида ҳарбий машинага қарши портловчи қурилма ишга туширилган ва оқибатда бир офицер енгил жароҳат олган.
Бош вазир идораси эълон қилган баёнотда ҲАМАС октябрь ойидаги келишувга тўлиқ амал қилиши шартлиги уқтирилди. Ҳужжатда қайд этилишича, мазкур келишув жангари гуруҳнинг Ғазодаги ҳокимиятдан четлатилишини, ҳудудни демилитаризация (қуролсизлантириш) ва дерадикализация қилишни кўзда тутади.
“Исроил бунга муносиб тарзда жавоб қайтаради”, дейилади баёнотда.
Ғазодаги вазият: Сулҳдан кейинги қурбонлар Ғазода 10 октябрдан буён ўт очишни тўхтатиш режими амал қилаётган бўлса-да, зўравонликлар бутунлай тўхтагани йўқ. Ҳар икки томон ҳам мунтазам равишда бир-бирини сулҳ шартларини бузишда айблаб келмоқда. Ғазо соғлиқни сақлаш вазирлиги маълумотларига кўра, сулҳ кучга кирганидан буён Исроил ҳужумлари оқибатида ҳудудда 400 дан ортиқ киши ҳалок бўлган.
