Кеча, 15 апрель куни парижлик эркак хайрия лотереясида Пабло Пикассонинг қиймати 1 миллион евродан ортиқ бўлган асл асарини ютиб олди. Бу ҳақда “Euronews” хабар берди.
Қайд этилишича, муҳандис ва санъат ихлосманди Ари Ходара Париждаги “Christie’s” аукцион уйидан бўлган видеоқўнғироққа жавоб берганида ўз ғалабаси ҳақида билган. 58 ёшли эркакка 1941 йилда чизилган испан рассоми ижодига мансуб асарнинг янги эгасига айланганини айтишганда, у: “Бу ҳазил эмаслигини қаердан биламан?” дея сўраган.
Ташкилотчиларнинг сўзларига кўра, жами 100 евродан 120 000 дан ортиқ лотарея сотилган бўлиб, бу Альцгеймер касаллиги бўйича тадқиқотлар учун қарийб 11 миллион евро йиғиш имконини берган. Ушбу ўйин 2013 йилда асос солинган “Бир Пикассо 100 евро эвазига” хайрия лотереясининг учинчиси бўлган.
Бу йил ғолибга Пикассонинг ўзига хос услубида, қоғозда гуаш билан ишланган “Аёл боши” (Tête de femme) портрети насиб этган. Унда рассомнинг ҳамроҳи ва илҳом париси, француз сюрреалист рассоми Дора Маар (Генриетта Теодора Маркович) тасвирланган.
