Ўзбекистонда 2025 йилда 267 мингдан ортиқ никоҳ қайд этилди. Ушбу никоҳлар орасида энг ёши катта куёв 91 ёшда, энг ёши катта келин эса 85 ёшда бўлгани қайд этилди. Бу ҳақда Адлия вазирлиги томонидан эълон қилинган йил якунларига оид маълумотларда келтирилган.
Ҳисоботга кўра, йил давомида никоҳдан ўтганлар орасида куёвларнинг ўртача ёши 25 ёшни, келинларнинг ўртача ёши эса 22 ёшни ташкил этган. Умумий никоҳлар сони 267 131 тани ташкил қилиб, бу кўрсаткич ўтган йилга нисбатан 1,7 фоизга камайган.
Шунингдек, 30 ёшгача бўлганлар ўртасида 227 мингдан ортиқ никоҳ қайд этилган. 30 ёшдан кейинги никоҳлар сони эса қарийб 40 мингни ташкил этиб, ушбу тоифадаги никоҳлар сони ўтган йилга нисбатан сезиларли даражада ошган.
Бундан ташқари, хорижий давлат фуқаролари билан тузилган никоҳлар сони 3 394 нафарни ташкил этди. Уларнинг 1 326 нафари эркаклар, 2 068 нафари эса аёллар ҳиссасига тўғри келади. Мазкур маълумотлар 2025 йилда никоҳ ёшида ҳам, никоҳ тузиш географиясида ҳам муайян ўзгаришлар кузатилганини кўрсатмоқда.
2025 йил якунлари бўйича давлат хизматлари кўрсатиш жараёнида 252 минг 747 та қонун бузилиши аниқланди. Қонун бузилишларининг асосий қисмини хизмат кўрсатиш муддатларини бузиш ҳолатлари ташкил этган — 170 минг 628 та. Шунингдек, 50 минг 775 та ҳолатда фуқароларга асоссиз рад жавоблари берилган, 16 минг 48 та ҳолатда эса ортиқча ҳужжатлар талаб қилинган.
Ҳисоботда иш битиши энг қийин бўлган ташкилотлар рейтинги ҳам келтирилган. Унда “Ҳудудгазтаъминот” 43 минг 367 та ҳолат билан биринчи ўринни эгаллаган. Кейинги ўринларда Кадастр агентлиги (32 минг 544 та), Соғлиқни сақлаш вазирлиги (21 минг 321 та), Қурилиш ва уй-жой коммунал хўжалиги вазирлиги (19 минг 176 та) ҳамда “Ҳудудий электр тармоқлари” АЖ (18 минг 14 та) қайд этилган.
Шу билан бирга, 2025 йилда давлат хизматларидан фойдаланиш ҳажми кескин ошгани маълум қилинди. Жами 26 миллион 401 мингдан ортиқ давлат хизмати кўрсатилган. Улардан 10,2 миллиондан зиёди ДХМлар орқали, 16,1 миллиондан ортиғи эса МyGov портали орқали амалга оширилган. Давлат хизматлари турлари сони 1 044 тага етган.
