Венесуэланинг нефть инфратузилмасини таъмирлаш ва модернизация қилишда ёрдам берган АҚШ компанияларига субсидиядалар берилади. Бу ҳақда АҚШ президенти Дональд Трамп NBC News телеканалига берган интервьюсида маълум қилди.
Трампнинг таъкидлашича, АҚШ компаниялари Венесуэлада нефть қазиб олишни кенгайтиришни назарда тутувчи лойиҳани 18 ой ичида якунлаши мумкин. Бироқ сиёсатчи бунинг учун “катта миқдорда пул сарфлаш” кераклигини айтмоқда. Bloomberg ҳисоб-китобларига кўра, Венесуэла нефть инфратузилмасини реконструкция қилиш 100 млрд долларга тушиши мумкин. Нефть ресурсларини ўзлаштиришда АҚШнинг ExxonMobil, ConocoPhillips ва Chevron компаниялари эҳтимолий иштирокчилар сифатида тилга олинмоқда.
“Венесуэлага кирган концернлар кейинчалик биздан ёки даромад ҳисобидан компенсация пули олади”, деди Трамп.
Илгари Америка компаниялари Венесуэла нефтининг йирик сармоядори бўлган, аммо 2000 йилларнинг ўрталарида мамлакат ҳукумати нефть секторини миллийлаштирган. Шундан сўнг Венесуэлада нефть қазиб олиш учдан бир қисмга камайган, бунда АҚШ томонидан жорий этилган жавоб санкциялари ҳам муҳим рол ўйнаган.
Соҳа таҳлилчилари Reuters билан суҳбатда америкалик ўйинчиларнинг Венесуэлага қайтишига маҳаллий инфратузилманинг етишмаслиги ва эскириши, шунингдек, мамлакатнинг сиёсий келажаги бўйича ноаниқлик тўсқинлик қилишини айтмоқда. Бундан ташқари, америкаликларнинг Венесуэладаги бундай иштироки учун ҳуқуқий асос ва АҚШ ҳарбий операциясидан кейинги сиёсати ноаниқлигича қолмоқда.
Мадуронинг қўлга олиниши ортидан АҚШ нефть сектори акциялари ошди
Сўнгги йилларда Венесуэлада ўз фаолиятини давом эттирган ягона йирик Америка компанияси — Chevron акциялари 5 январь куни беш фоизга ошди. Шу куни Маратҳон Petroleum, Phillips 66 ва Valero Energy каби нефтни қайта ишловчи компаниялар акциялари 3 фоиздан 9 фоизгача қимматлашди. Соҳа билан боғлиқ Baker Hughes, Halliburton ва SLB компаниялари акциялари ҳам ўсиш кўрсатди.
