Ҳиндистоннинг Air India авиакомпанияси самолётини бошқарган учувчилардан бири парвоз вақтида наркотик таъсирида бўлгани аниқланди. Бу ҳақда манбаларга таяниб, Bloomberg хабар берди.
Ҳодиса 4 август куни Пхукетдан Нью Деҳлига учаётган самолёт билан содир бўлган. Airbus A320neo самолёти турбулентлик зонасига тушгач, баландлигини тўсатдан қарийб 90 метрга пасайтирган. Самолёт бортида 137 нафар йўловчи ва саккиз нафар экипаж аъзоси бўлган. Ҳодиса оқибатида 20 йўловчи ва тўрт нафар экипаж аъзоси Ҳиндистон пойтахтига қўнгач, касалхонага ётқизилган.
Самолётни бошқарган ҳар икки учувчи психоактив моддалар бўйича тест топширган. Дастлабки тест натижасида учувчилардан бирида ижобий кўрсаткич аниқланган. Кейинчалик ўтказилган такрорий тест ҳам ижобий натижа берган.
Ҳиндистон Фуқаро авиацияси вазирлиги тергов давом этаётганини билдирди. Унинг қоидаларига кўра, биринчи ижобий тест натижасидан сўнг қоидабузар реабилитация дастурига юборилади. Парвоз қилиш ҳуқуқини тиклаш учун у қайта тест топшириб, салбий натижа олиши керак. Такрорий ижобий натижа қайд этилса, учувчининг лицензияси уч йилга тўхтатилади. Учинчи ижобий натижа эса лицензиянинг бутунлай бекор қилинишига олиб келади.
