Samsung Electronics (005930.КS) ўзининг биринчи уч қаватли смартфони — Galaxy Z TriFold’ни намойиш этди. Компания бу янги модель орқали Хитойда тобора кучайиб бораётган рақобатчиларига қарши бозордаги мавқеини янада мустаҳкамлашни мақсад қилган. Бу ҳақда “Economictimes” хабар берди.
Қайд этилишича, Galaxy Z TriFold тахминан 3,59 миллион вон (2 440 доллар) нархда бўлиб, уч панель ёрдамида 253,1 мм (10 дюйм) экран ўлчамига очилади. Бу Samsung’нинг сўнгги Galaxy Z Fold 7 модели экранидан қарийб 25% каттароқ.
Samsung Electronics’нинг савдо ва маркетинг бўлими раҳбари Алекс Лимга кўра, янги модель кенг омма учун эмас, балки айнан шундай форматни хоҳлайдиган махсус мижозларга мўлжалланган.
Жанубий Кореяда ишлаб чиқарилган TriFold 12 декабрда мамлакат ичида сотувга чиқади. Йил охиригача Хитой, Сингапур, Тайвань ва БАА бозорига ҳам етиб боради. АҚШда эса сотувлар келаси йилнинг биринчи чорагида бошланиши кутилмоқда.
Қурилма Samsung’нинг энг катта аккумуляторига эга бўлиб, 30 дақиқада 50 фоизгача қувватлайдиган ултратез зарядлаш функциясини қўллаб-қувватлайди. Лим хотира чиплари ва бошқа компонентлар нархи кескин ошгани сабаб нархни белгилаш “қийин қарор” бўлганини тан олди.
Букланадиган телефонлар бозоридаги рақобат кучаймоқда. Huawei ўтган йил сентябрда саноатдаги биринчи уч томонлама букланадиган телефонни сотувга чиқарган. Apple эса ўзининг илк букланадиган iPhone моделини келаси йили тақдим этиши кутилмоқда.
Шунга қарамай, таҳлилчилар юқори нархлар ва оммавий ишлаб чиқаришдаги чекловлар бозор ўсишини секинлаштириши мумкинлигини айтмоқда.
Counterpoint Research маълумотларига кўра, букланадиган телефонлар жорий йилда умумий смартфон бозорининг 2 фоиздан камроғини, 2027 йилга келиб эса 3 фоиздан ҳам кам қисмини ташкил этади.
Samsung’нинг букланадиган телефонлар бозоридаги улуши учинчи чоракда 64 фоизга ошган. Бу кўрсаткич маҳсулот сотувга чиқиш даврига қараб сезиларли ўзгариб туришини билдиради.
