Хитойнинг UBTECH Robotics компанияси дунёдаги илк роботлаштирилган завод мажмуасини ишга туширди. Корхона йилига 10 мингтагача гуманоид роботларни ишлаб чиқариш қувватига эга. Бу ҳақда “Оху.аз” хабар берди.
Завод Хитой жанубидаги Лючжоу шаҳрида (Гуанси-Чжуан мухтор райони) жойлашган. Унинг қуввати ҳар ўн дақиқада биттадан робот ишлаб чиқариш имконини беради.
Лойиҳа энг илғор режалаштириш технологиялари ва саноат симуляцияси тизимларидан фойдаланади. Ишлаб чиқариш циклининг асосий ўзига хос томонларидан бири шундаки, бу ерда роботлар роботларни ясамоқда. Шу тариқа, Хитой гуманоид роботларни лабораторияда эмас, заводда оммавий ишлаб чиқаришни бошлади.
Завод 14 минг квадрат метр майдонни эгаллаган. У ерда асосан Walker S ва Cruzr сериясига мансуб ақлли саноат роботлари тайёрланади. Мажмуа Германиянинг Siemens Digital Industries Software компанияси иштирокида қурилган. Бошқарув тизими жараённинг барча босқичларини, жумладан, буюртмаларни режалаштириш, хом ашё етказиш ва сифат назоратини рақамли тарзда тўлиқ назорат қилади.
Ишлаб чиқариш линиясида гуманоид роботларнинг ўзи юкларни туширади ва материалларни ташиб беради. Ҳар бир янги тайёрланган машина тўрт соатдан ортиқ синовдан ўтказилади. Ҳайдовчисиз юк кўтарувчилар ва машиналардан фойдаланувчи “ақлли” тизим бутун занжирни — қисмларни йиғишдан тортиб, тайёр маҳсулотни синаш ва сақлашгача бўлган жараённи қамраб олган.
