Apple компанияси тарихида илк бор сенсорли экранга эга MacBook Pro’ни тақдим этди.Янги модель 14 ва 16 дюймли экран ўлчамларида ишлаб чиқарилади. У 2000 нитгача ёрқинлик ва 10 000 000:1 контраст нисбатига эга PROLED XDR дисплейи билан жиҳозланган.
Компания маълумотига кўра, янги MacBook бир қувватланишда 24 соатгача ишлайди. Тезкор қувватлаш функцияси ёрдамида қурилма 30 дақиқада 50 фоизгача заряд олади.
Фойдаланувчилар саҳифаларни варақлаш, расмларни бармоқлари билан катталаштириш, элементларни бошқа ойнага кўчириш ва интерфейсни бевосита бошқариш имкониятига эга бўлади. Қурилма Pro М5 Pro ва М5 Мах процессорлари билан жиҳозланган. Бу компания томонидан профессионал ноутбуклар учун яратилган энг кучли чиплардир.
Янги MacBook Pro сотуви 6 ноябрда бошланади. АҚШда 14 дюймли моделнинг бошланғич нархи 2749 долларни, 16 дюймли моделники эса 3199 долларни ташкил этади.
Сенсорли MacBook Pro’нинг пайдо бўлиши Apple’нинг узоқ йиллик ёндашувидаги муҳим ўзгаришдир. Компания аввал iPad ва Маc функцияларини бирлаштиришдан бош тортиб келган.
