Таиланд расмийлари Ўзбекистон, Колумбия ва Мексикадан келадиган сайёҳлар учун 15 кунлик визасиз режим жорий этишни таклиф қилди. Бу ҳақда Таиланд Туризм ва спорт вазирлигига таяниб The Nation хабар берди.
Таклиф ҳужжат расмийлаштиришдаги кечикишларни бартараф этиш ва саёҳатларни кўпайтириш мақсадида илгари сурилган. Бу ташаббус халқаро авиаташувчилар дуч келаётган логистик тўсиқларнинг кучайишига жавобан амалга оширилмоқда. Яқинда Emirates авиакомпанияси Таиланд туризм идорасига (ТАТ) расмий шикоят йўллаб, Таиланд визасини ўз вақтида ололмагани учун Мексикадан ҳар бир рейсда 20-30 нафар йўловчи қолиб кетганини билдирди.
Туризм ва спорт вазири Сурасак Пҳанчароэнворакул вазирлик виза кечикишларидан хабардор эканини тасдиқлади.
“Вазирлик 9 ноябрь куни Виза сиёсати қўмитаси йиғилишига Лотин Америкаси потенциал бозорлар ва бошқа мақсадли мамлакатлар, жумладан, Колумбия, Мексика ва Ўзбекистон учун 15 кунлик визасиз киришни тасдиқлаш бўйича таклиф киритиб, узоқ муддатли ечим тайёрлади”, деди Сурапонг.
Таиланд визасини олиш тартиби
Таиландга боришни режалаштираётган Ўзбекистон фуқароларининг электрон виза аризалари амалда ўртача 15 кунда тасдиқланмоқда. Электрон виза олиш учун топширилган аризаларни кўриб чиқиш муддати 10 кундан ошмаслиги белгиланган. Бироқ амалда визани тасдиқлаш ҳақидаги хабар йиғим тўланганидан кейин ўртача 15 кун ичида ариза берувчининг электрон почтасига юборилмоқда.
Ўзбекистон фуқаролари Таиланд визасини thaievisa.go.th сайти орқали онлайн ариза топшириш йўли билан расмийлаштириши мумкин. Бунинг учун шахсий аккаунт яратиш, электрон анкетани тўлдириш ва зарур ҳужжатларни юклаш талаб этилади.
Виза йиғими 40 долларни ташкил этади. Уни Таиланднинг Москвадаги элчихонасида нақд пул шаклида тўлаш керак. Тўловни учинчи шахслар, жумладан, турагентлар орқали амалга оширишга ҳам рухсат берилган. Аризани кўриб чиқиш жараёни йиғим тўланганидан кейингина бошланади.
Маълумот учун, Таиланд 2026 йилнинг дастлабки тўрт ойида Ўзбекистон фуқаролари энг кўп ташриф буюрган топ-10 давлат қаторидан жой олган. Ушбу даврда мамлакатга 16 291 нафар ўзбекистонлик борган. Рўйхатда биринчи ўринни қўшни Қирғизистон, кейинги ўринларни эса Тожикистон ва Қозоғистон эгаллаган.
