Пойтахтнинг Юнусобод туманидаги собиқ “Тоштурма” ўрнида меҳмонхона ёки кўпқаватли уй-жой қурилиши мумкин.
Сенатнинг Аграр, сув хўжалиги масалалари ва экология қўмитаси раисининг ўринбосари Сайёра Абдикаримова томонидан Тошкент шаҳар ҳокими Шавкат Умурзоқовга Юнусобод тумани Наманган кўчаси 1-уй манзилида жойлашган собиқ 1-сонли тергов ҳибсхонаси ҳудудига замонавий хиёбон барпо этилиши масаласи юзасидан 6 октябрда сенатор сўрови юборилганди. Ҳокимлик бунга жавобан 13 октябрда тегишли маълумотнома йўллади. Сенат матбуот хизмати уни 6 ноябрда эълон қилди.
Сенатор сўрови нега юборилганди?
Юнусобод тумани Наманган кўчаси 1-уйда жойлашган собиқ 1-сонли тергов ҳибсхонаси бино-иншоотлари ва унга тегишли ҳудуд 2028 йилда Тошкент шаҳар ҳокимлиги балансига ўтказилган эди. Ҳужжат билан мазкур ҳудудда барча зарур инфратузилмага эга замонавий хиёбон (дам олиш маскани) барпо этиш вазифаси юклатилганди. Халқ орасида “Тоштурма” номи билан машҳур бўлган мазкур ҳибсхона ўша йилнинг январь ойида Зангиота туманига кўчирилган эди.
Бироқ орадан анча вақт ўтганига қарамай, фармойишда белгиланган вазифалар ижроси ҳанузгача тўлиқ таъминланмагани, ҳудуд қаровсиз ҳолатда қолаётгани, айрим қурилиш компаниялари томонидан эса ҳудуддан хусусий манфаатларда фойдаланишга бўлган уринишлар кузатилаётгани фуқароларнинг ҳақли эътирозларига сабаб бўлаётгани туфайли сенатор сўрови юборилди.
Пойтахт ҳокимлиги жавоби
Тошкент шаҳар ҳокимининг 2020 йил 7 октябрдаги қарорига асосан Ogneupor корхонасига Чинобод кўчасидаги ўзига тегишли объект бузиб ташлангани учун компенсация сифатида 2,9 гектар ер майдони (собиқ тергов ҳибсхонаси ҳудуди) берилган ҳамда кадастр ҳужжатлари шакллантирилиб, ер участкасидан доимий фойдаланиш ҳуқуқи 2021 йил 5 октябрда давлат рўйхатидан ўтказилган.
Юнусобод тумани Қурилиш бошқармаси Архитектура-шаҳарсозлик кенгаши хулосаси асосида 76 квадрат метр майдонга эга маъмурий бино лойиҳаси тасдиқланган. Қурилиш 2024 йил 6 апрелда фойдаланишга топширилган бўлиб, объект нотурар жой сифатида рўйхатдан ўтказилган. Кейинчалик ушбу участка консервация зонасига киритилган, яъни қўшимча турар жой ва нотурар жой объектларини қуриш тақиқланган.
Ишчи гуруҳ томонидан ҳолат ҳудудга чиққан ҳолда ўрганилиб, жамият раҳбари билан суҳбатлашилганида маълум бўлишича, компенсация тариқасида олиб қўйилган Чинобод кўчаси 8-уй манзилда жойлашган ер майдонида дастлаб корхона ёнғинга чидамли материаллар ишлаб чиқариш учун саноат объектини қуришни режалаштирган. Бироқ ер майдони тўлиқ аҳоли пунктида жойлашгани, атрофи тўлиқ уй-жойлар билан қамраб олингани сабабли ишлаб чиқариш корхонаси қуриш мумкин эмаслиги маълум бўлган. Шу сабабли замонавий меҳмонхона қуришга қарор қилинган, бироқ ҳозирда лойиҳани амалга ошириш учун маблағ етишмаяпти.
Собиқ “Тоштурма” ўрнида меҳмонхона ёки кўпқаватли уй қурилиши мумкин
Ҳокимлик хатида келтирилишича, 2022 йилда, сўнгра 2025 йил февраль—август ойларида корхона 2,9 гектар ер майдонини хусусийлаштириш учун ариза топширган. Бироқ Тошкент шаҳрининг Бош режасига кўра, участка консервация зонасига киритилгани сабабли улар рад этилган. Корхона раҳбарияти участка консервация зонасидан чиқарилган тақдирда инвесторни жалб қилиб, меҳмонхона ва маиший хизмат кўрсатиш объектлари бўлган кўп қаватли турар жой биносини қуриш лойиҳасини амалга ошириш ниятида.
