Бугун жиноят ишлари бўйича Шайхонтоҳур туман судининг ёпиқ суд мажлиси якунида Азиз Ҳакимовга доир жиноят иши юзасидан суд ҳукми ўқилди. Бу ҳақда Тошкент шаҳар судлари хабар берди.
Азиз Ҳакимов ижтимоий тармоқлардаги саҳифаларида Ўзбекистон Республикасининг суверенитетига қарши чиқишлари, СССРни тарғиб қилиб, уни қайта тиклаш зарурлиги ғоясини илгари сургани билан машҳур.
Шунингдек, унинг 1930 йиллардаги сиёсий қатағон қурбонлари ҳамда 1920 йиллардаги миллий-озодлик кураши иштирокчилари хотирасини қоралаган чиқишлари ҳам тармоқларда жиддий баҳслар ва норозиликларни юзага келтирган эди.
Судланувчининг ҳаракатларида Жиноят кодексининг 150-моддасида (урушни тарғиб қилиш) назарда тутилган жиноят таркиби бўлмаганлиги сабабли Жиноят-процессуал кодексининг 83-моддаси (реабилитация учун асослар) 2-бандига асосан оқланди.
Азиз Ҳакимов Жиноят кодекси 139-моддасининг 2-қисмида (туҳмат), 140-моддасининг 2-қисмида (ҳақорат қилиш) ҳамда 156-моддасининг 2-қисмида (миллий, ирқий, этник ёки диний адоват қўзғатиш) назарда тутилган жиноятларни содир этишда айбдор, деб топилди.
Жиноят кодексининг 59,61-моддалари тартибида тайинланган жазоларни қисман қўшиш йўли билан ўташ учун узил-кесил 4 йил 2 ой муддатга озодликдан маҳрум қилиш жазоси тайинланди.
Шунингдек, суд ҳукм билан Рақамли технологиялар вазирлигига судланувчи томонидан юритилган Telegram мессенжеридаги “Comrade_Aziz каналини блоклаш мажбурияти юклатилди.”
Бундан ташқари:
- иш бўйича 6 нафар жабрланувчига ўзларига етказилган моддий ва маънавий зарарларни ундириш юзасидан фуқаролик ишлари бўйича судга мурожаат этиш;
- судланувчига ҳукмга нисбатан юқори суд инстансиясига шикоят бериш муддати ва тартиблари тушунтирилди.
