Қозоғистоннинг Олмаота шаҳри аэропортида техник хизмат кўрсатиш ишлари вақтида FlyArystan авиакомпаниясининг самолёти ёниб кетди. Ёнғин тезда ўчирилган, аммо Air Astana компаниясининг бир нафар ходими жароҳат олган. Бу ҳақда “Tengri Travel” хабар берди.
Авиакомпания маълумотларига кўра, ҳодиса юз берган вақтда самолётда режали техник хизмат кўрсатиш ишлари олиб борилаётган бўлган. Ишлар давомида ёнғин чиққан. У аэропортнинг фавқулодда хизматлари томонидан тезкорлик билан бартараф этилган.
Ёнғинга айнан нима сабаб бўлганига ҳозирча аниқлик киритилмаган. Ҳозирда ҳодиса авиакомпания томонидан Олмаота аэропорти билан ҳамкорликда ўрганилмоқда. Ҳодиса вақтида бортда йўловчилар ҳам, экипаж аъзолари ҳам бўлмаган. Шу билан бирга, ҳодиса чоғида Air Astana ходими жароҳат олган. Унга тиббий ёрдам кўрсатилиб, сўнг шифохонадан жавоб берилган.
Ҳодисадан сўнг ҳаво кемаси вақтинча фойдаланишдан чиқарилган. Ҳозирда мутахассислар самолётга қанчалик зарар етганини баҳоламоқда ва зарур таъмирлаш ишларини олиб бормоқда.
