Фарғона вилоятида криминал вазиятни барқарорлаштириш ва уюшган жиноятчиликка қарши курашиш мақсадида вилоят Ички ишлар бошқармаси ҳамда Давлат хавфсизлик хизмати ходимлари билан ҳамкорликда олиб борилган тезкор тадбирларда яна бир жиноий гуруҳ фош этилди. Бу ҳақда вилоят Ички ишлар бошқармаси хабар берди.
Маълум бўлишича, жорий йилнинг 28 январь куни Фарғона тумани “Оқбилол” қишлоғида яшовчи фуқаро Фарғона шаҳрида яшовчи танишига қўнғироқ қилиб, ундан Қува туманида яшовчи шахс қарздор эканлигини, ушбу қарзни олишда амалий ёрдам беришини сўрайди. Қарздорга қарзни зудлик билан эгасига қайтариб бериш айтилганда эса, у таниши Сирожиддин Ортиқовга ҳолатни баён қилади. Ортиқов ҳам масалани кўча ечими билан ҳал қилиш учун таниши Нодир Солиевга мурожаат қилган ва у орқали Фарғона шаҳрида яшовчи ака-ука Илҳомжон ва Арабжон Мамировларга хабар қилинади.
Оқибатда ака-ука Мамировлар гумашталари билан бирга Фарғона шаҳрида юқоридаги икки нафар шахслар билан кўришиб, уларни Қува туманидаги мева боғ ҳудудига олиб кетишади ва у ерда қўрқитиб, тан жароҳат етказиб, қарз тўлиқ қопланганлиги тўғрисидаги тилхатни мажбуран ёздириб олади.
Шу куни ака-ука Мамировлар қарз масаласини кўча ечимлари орқали ҳал қилишгач, эвазига қарздорнинг пластик картасини олиб қўйиб, жами 12 миллион сўм миқдоридаги пул маблағларини ўзлаштириб олади. Бундан ташқари, шу куни қарздорнинг акасидан ҳам масала ҳал қилинганлиги учун яна 5 миллион сўм пулни қўлга киритади.
Мазкур ҳолат юзасидан ҳамкорликда олиб борилган тезкор қидирув тадбирлари натижасида жиноятни содир қилишда гумонланган Арабжон Мамиров, Қодир Солиев ҳамда Сирожиддин Ортиқов қўлга олиниб, жиноят процессуал кодексининг 221-моддаси тартибида ушланган. Ҳозирда Илҳомжон Мамировни ушлаш чоралари кўрилмоқда
