Европа футбол ассоциациялари иттифоқи (УЕФА) Чемпионлар лигасининг умумий босқич 7-туридан ўрин олган Праганинг “Славия” жамоасига қарши ўйин (2:4) якунларига кўра, “Барселона”га 30,5 минг евро миқдорида жарима солди. Бу ҳақда УЕФАга таяниб, Mundo Deportivo хабар бермоқда.
“Кўк-анорранглилар” мухлислар томонидан файерлар ёқилгани учун 15,5 минг евро тўлаши талаб этилади. Яна 15 минг евро миқдоридаги жарима Каталония клубига майдонга чиқишнинг кечикиши сабабли тайинланган. Таъкидланишича, ушбу кечикиш “Барселона” бош мураббийи Ҳанси Фликнинг ҳаракатлари туфайли юзага келган бўлиб, у УЕФА томонидан келгусида жазоланиши мумкин бўлган огоҳлантириш олган.
Чемпионлар лигасининг умумий босқичи якунларига кўра, Каталония клуби 16 очко жамғарди ва бешинчи ўринни эгаллаб, 1/8 финалга йўл олди.
Аввалроқ клуб ўз академияси тарбияланувчиларининг маълум босқичлардаги муваффақиятларига қараб, шартномасидаги товон пули (шартномани бекор қилиш ҳуқуқини берувчи тўлов) миқдорини босқичма-босқич ошириб борадиган тизимни ишга туширгани хабар қилинган эди.
Ушбу ўзгаришлар 2026 йил январь ойида 18 ёшли Дро Фернандеснинг “ПСЖ”га ўтиши ортидан юз берди. Париж клуби ярим ҳимоячининг 6 млн евролик товон пулини тўлади, якуний трансфер суммаси эса “Барса”га тўланадиган компенсациялар билан бирга 8 млн евродан бир оз кўпроқни ташкил қилган.
Қайд этилишича, агар Дро янги шартлар асосида шартнома имзолаганида ва асосий жамоа сафидаги 5 та ўйини ҳисобга олинганда, унинг товон пули 25 миллион еврони ташкил қилган бўлар эди.
