NASA’нинг Perseverance марсоходи Марсдаги Езеро кратерида Ерда ёқут ва сапфирларни ҳосил қилувчи қимматбаҳо минерал — хром таркибли минерал изларини аниқлади. Бу ҳақда «Хайтек» Geophysical Research Letters журналида эълон қилинган тадқиқотга таяниб хабар берди.
Маълум қилинишича, марсоход SuperCam лазер қурилмаси ёрдамида Езеро кратери четидаги учта оч рангли тоғ жинсини текширган. Спектрал таҳлил натижасида улар таркибида хром аралашган кристалл алюминий оксиди аниқланган. Айнан хром ёқутга ўзига хос қизғиш-пушти ранг беради.
Ушбу топилма олимларни ҳайратга солган. Чунки корунд ҳосил бўлиши учун юқори ҳарорат, алюминийнинг катта миқдори ва кремнийнинг деярли йўқлиги талаб этилади. Марсда эса бундай геологик шароит жуда кам учрайди.
Лос-Аламос миллий лабораторияси олимлари корунднинг пайдо бўлишини миллиардлаб йиллар аввал Езеро кратерини ҳосил қилган улкан метеорит зарбаси билан боғламоқда. Тахминларга кўра, кучли зарба зарур босим ва ҳароратни юзага келтирган, кейинги гидротермал жараёнлар эса тоғ жинсларидаги ортиқча кремнийни ювиб кетган.
Олимлар келажакда Марс тупроғи намуналарини Ерга олиб келиш орқали ушбу минералларни лаборатория шароитида батафсил ўрганиш ва Марсда «қимматбаҳо тошлар» қандай пайдо бўлганини аниқлашга умид қилмоқда.
