Ойга ўн кунлик парвозни амалга оширадиган Artemida-2 миссияси астронавтлари Ер рационига яқин таомлар билан озиқланади. НАСА экипаж учун тайёрланган менюни эълон қилди.
Экипажнинг тўрт аъзоси 2026 йил апрель ойида Orion космик кемасида Ойга йўл олади. Ушбу парвоз 1972 йилдан буён инсониятнинг паст Ер орбитаси чегарасидан чиқиб, олис фазога йўл олиши билан боғлиқ биринчи ҳолат бўлади. Астронавтлар учун меню космик озиқланиш бўйича мутахассислар билан тузилган. Улар таомларнинг калорияси, тўйимлилиги, сақланиш муддати ва миссия иштирокчиларининг шахсий хоҳиш-истакларини инобатга олган.
Озиқ-овқатни танлашда асосий шарт ускуналар хавфсизлиги бўлган. Маҳсулотлар вазнсизликда сочилиб кетиши ва техникага тушиши мумкин бўлган ушоқларни ҳосил қилмаслиги керак. Шунингдек, пишириш қулайлиги ва узоқ вақт сақлаш имконияти ҳам инобатга олинган.
Таомномада тортиля, қовурилган мол тўши, пишлоқли макарон, пиширилган брокколи, кўк ловия, сабзавотли киш, ёнғоқли кускус, черника грануласи ва нонушта учун колбасалар бор. Бундан ташқари аччиқ соуслар, хантал, мураббо, асал, ерёнғоқ ва бодом ёғи.
Экипаж аъзолари кофе, кўк чой, манго ва шафтолили смузи, шунингдек, шоколадли, ванилли ҳамда қулупнайли ичимликларни танлаши мумкин. Ичимликлар қаторида лимонад, олма сиркаси, ананасли шарбат ва какао ҳам мавжуд. Бироқ ҳар бир астронавтга бир суткада иккитадан кўп бўлмаган хушбўй ичимлик ичишга рухсат берилади.
Баъзи таомлар сув қўшишни талаб қилади. Бунинг учун кемада махсус диспенсер ўрнатилган. Аммо космик кема старт олиш ва Ерга қўниши вақтида ушбу тизим ишламайди. Шу сабабли парвознинг бу босқичлари учун қўшимча ишлов беришни талаб қилмайдиган тайёр маҳсулотлар ажратилган. Орбита бўйлаб ҳаракат бошлангач, экипаж таомларни иситиш учун махсус иситгичдан фойдаланиши мумкин.
Экипаж аъзолари фақат космик кема учаётган ва Ерга қайтаётган қисқа дақиқаларда овқатланмайди. Қолган барча вақтда улар учун тўлақонли нонушта, тушлик ва кечки овқат кўзда тутилган.
