Илон Маск бойлиги 800 миллиард доллардан ошган дунёдаги биринчи одамга айланди. Капиталнинг ўсишига миллиардерга тегишли SpaceX ва хАI компаниялари бирлашуви сабаб бўлди. Бу ҳақда Forbes хабар берди.
Forbes ҳисоб-китобларига кўра, қиймати 1,25 триллион долларга баҳоланган ушбу келишув Маскнинг бойлигини 84 миллиард долларга оширган ва натижада унинг умумий бойлиги 852 миллиард долларга етган.
Келишувдан олдин Маск ракета ишлаб чиқарувчи SpaceX компаниясининг 336 миллиард долларлик тахминий 42 фоиз улушига эгалик қилган. Компаниянинг умумий қиймати 800 миллиард долларга баҳоланган. Шунингдек, Маск сунъий интеллект ва ижтимоий тармоққа асосланган хАI компаниясининг 49 фоиз улушига эгалик қилган, бу 122 миллиард долларга тенг.
Бирлашувдан сўнг SpaceX — 1 триллион доллар, хАI эса 250 миллиард долларга баҳоланмоқда. Маскнинг бирлашган компаниядаги улуши 43 фоиз, қийматини эса 542 миллиард долларни ташкил этади. Бу ЅpaceХ’ни Маскнинг энг қимматли активига айлантиради. Шунингдек, у Tesla’нинг 178 миллиард долларлик 12 фоиз улушига ва яна 124 миллиард долларлик Tesla акцияларига эгалик қилади.
Бунга Tesla акциядорлари ноябрь ойида маъқуллаган рекорд даражадаги мукофот пакети киритилмаган. Агар Tesla келгуси 10 йил ичида бозор қийматини саккиз баробардан кўпроқ оширса, Маск яна 1 триллион долларгача акцияга эга бўлиши мумкин.
Бу сўнгги бир йил ичида Маск компанияларининг иккинчи бор бирлашуви ҳисобланади. 2025 йил март ойида у хАI ва ўзининг X ижтимоий тармоғини (собиқ Twitter) бирлаштирганини эълон қилганди. Ўша келишувда хАI 80 миллиард доллар, X эса 33 миллиард долларга баҳоланган.
