Том Круз Governors Аwардс маросимида кинодаги ютуқлари учун фахрий “Оскар” мукофотини қўлга киритди. Бу ҳақда Variety нашриёти хабар бермоқда.
Кинога бўлган муҳаббатим жуда ёшлигимдан бошланган ва ўзимни таниганимдан бери давом этиб келмоқда, — деди Круз миннатдорлик нутқида. — Кичкиналигимда қоронғи кинотеатрда ёруғлик нури хонани кесиб ўтганини, юқорига қараганимда эса у экранда портлаб кетгандек туюлганини эслайман. Тўсатдан дунё мен билганимдан анча каттароқ бўлиб қолган. Бу менда саргузаштларга, билимга, инсониятни тушунишга, образлар яратишга, ҳикоялар айтишга ва дунёни кўришга бўлган иштиёқни уйғотди.
Шу вақтгача Круз тўрт марта “Оскар” мукофотига номзод бўлган, аммо ғолиб бўлмаганди. У уч марта “Тўртинчи июлда туғилган”, “Жерри Магуаер” ва “Магнолия” фильмларидаги роллари учун энг яхши актёр унвонини қўлга киритишга ҳаракат қилган. Бундан ташқари, Круз продюсер сифатида “Топ Ган: Меверик” фильми билан 2023-йилда “Энг яхши фильм” мукофотига даъвогарлик қилган.
Фахрий мукофотлар Америка кино академияси томонидан лауреатнинг бутун умри давомидаги ажойиб ютуқлари, кино санъати ва илм-фаннинг исталган соҳасига қўшган беқиёс ҳиссаси ёки Академия олдидаги алоҳида хизматлари учун берилади. Фахрий “Оскар”лар одатда март ойида ўтказиладиган асосий маросимдан бир неча ой олдин топширилади.
Круз билан бир қаторда актриса ва хореограф Дебби Аллен ҳамда саҳналаштирувчи рассом Уинн Томас ҳам фахрий мукофотларга сазовор бўлди. Қўшиқчи ва актриса Долли Партон эса инсонпарварлик соҳасидаги хизматлари учун Жин Хершолт номидаги мукофотга лойиқ кўрилди.
