Tesla инвесторлари компания раҳбари Илон Маскка бошқарувдаги ютуқлари учун деярли бир триллион долларлик мукофот тўлашни маъқуллади. Бу ҳақда акциядорларнинг йиллик йиғилиши трансляцияси давомида маълум қилинди.
“2025 йилдаги ютуқлар учун компаниямиз асосчиси ва бош директори Илон Маскни мукофотлаш масаласида 75 фоиздан ортиқ овоз “ҳа” деб берилди. Қарор қабул қилинди”, деди компания вакили йиғилишда.
Бироқ Маск ушбу мукофотни фақат компания капиталлашуви кейинги ўн йил ичида яна 7,5 триллион долларга ошган тақдирда олиши мумкин. Тўлов бир неча босқичда амалга оширилади ва у эришилган натижаларга боғлиқ бўлади. Ҳозирда Tesla нинг бозор қиймати қарийб 1,5 триллион долларни ташкил этади.
CNBC телеканалининг хабар беришича, Маск акциядорлар унга бир триллион долларлик мукофот тўлашни маъқулламаса, компанияни тарк этиш билан таҳдид қилган. Ушбу мукофотнинг мақсади – компания раҳбарининг келгусида ҳам Tesla фаолиятига тўлиқ эътибор қаратишини таъминлаш.
Маълумот учун, Tesla Motors компанияси 2003 йилда электр автомобиллар ва улар билан боғлиқ технологияларни ишлаб чиқиш ҳамда ишлаб чиқариш мақсадида ташкил этилган. Компания нафақат электромобиллар, балки ўз технологияси асосида батареялар ва электромоторлар ишлаб чиқади ва уларни Toyota ҳамда Daimler каби автомобиль ишлаб чиқарувчи компанияларга ҳам сотади.
