Тадбиркор Илон Маск кетма-кет иккинчи йил “Forbes” талқини бўйича дунёнинг энг бой одамлари йиллик рейтингида биринчи ўринни эгаллади. Бу ҳақда “Forbes”нинг расмий сайтида эълон қилинди.
Tesla, SpaceX асосчиси ва X ижтимоий тармоғи эгасининг сармояси 839 миллиард АҚШ долларига етди. Маск февраль ойи бошида SpaceX компаниясининг ўз xAI стартапи билан бирлашишидан сўнг бойлиги 800 миллиард АҚШ долларлик довондан ошган илк инсонга айланди.
Лидернинг иккинчи ўриндаги Google ҳаммуассиси Ларри Пейж (257 млрд АҚШ доллари) билан орасидаги фарқ 500 миллиард АҚШ долларидан ошади. Рейтингда учинчи ўринни Google’нинг яна бир асосчиси — Сергей Брин 237 миллиард АҚШ доллари бойлик билан эгаллади.
Ундан кейинги ўринларда Amazon асосчиси Жефф Безос (224 млрд АҚШ доллари) ва кучли бешликни Meta эгаси Марк Цукерберг 222 миллиард АҚШ доллари билан якунлаб берган.
“Ўтган йил давомида аҳоли фаровонлиги мисли кўрилмаган даражада ўсди, чунки бойлар ҳайратланарли тезликда янада бойишда давом этмоқда. Бу йилги рўйхатда 3428 нафар миллиардер қайд этилди, бу ўтган йилгига нисбатан 400 кишига кўп ва 1987 йилда рўйхат тузила бошланганидан бери рекорд кўрсаткичдир”, дейилади материалда.
Дунёнинг энг бой одамлари жами бўлиб рекорд даражадаги 20,1 триллион долларга эгалик қилмоқда (бир йил олдин 16,1 трлн доллар эди). Рейтингдаги биринчи ўнталикнинг умумий бойлиги 2,6 триллион долларга баҳоланмоқда. Бундан ташқари, бойлиги 100 миллиард доллардан ошадиган инсонлар сони ҳам рекорд даражага – 20 нафарга етди.
Бу йилги “Forbes” миллиардерлари рейтингига 390 нафар янги иштирокчи кирди, улар орасида Маскнинг акаси Кимбал, рэпер ва продюсер Dr.Dre (Андре Янг), хонанда Бейонсе Ноулз-Картер ва теннисчи Рожер Федерер бор. Рўйхатдан 89 киши, хусусан, NASA раҳбари Жаред Айзекман чиқариб ташланди.
Маск сармоясининг жадал ўсишига асосий драйвер сифатида унинг қиймати 250 миллиард долларгача кўтарилган xAI стартапига киритилган инвестициялар ҳамда SpaceX муваффақиятлари хизмат қилди. Охиргиси 2026 йилдаёқ акцияларини бирламчи оммавий жойлаштиришга (IPO) тайёргарлик кўрмоқда, бунда компания 1,5 триллион доллардан кўпроққа баҳоланиши мумкин. Бу тарихдаги энг йирик IPO бўлади ва тадбиркорнинг бойлигини янада оширади.
Таҳлилчиларнинг прогноз қилишича, агар SpaceX IPO’си муваффақиятли ўтса ва унинг компаниялари ҳозирги ўсиш суръатини сақлаб қолса, Маск тарихдаги илк 1 триллион долларлик сармояга эга инсонга айланиши мумкин. “Forbes” ўнталигидан асосан технология сектори вакиллари жой олган бўлиб, ўн нафар миллиардердан саккиз нафари АҚШ фуқаросидир.
Маск сармоясининг ўсиши технологик бозордаги беқарорлик фонида юз бермоқда. Дунёнинг ўнта энг бой одамларидан олти нафари февраль ойида ўз компаниялари акциялари курси тушиши ортидан бойлигининг бир қисмини йўқотди. Энг катта йўқотишларни Жефф Безос (минус 260 млрд АҚШ доллари), Марк Цукерберг (минус 230 млрд АҚШ доллари) ва Oracle асосчиси Ларри Эллисон (минус 210 млрд АҚШ доллари) кўрди.
